Uy, Pareng Poldo, asa man ka?" timbaya ni Pareng Luis niya. "Adto ko sa siyudad, ikaw?" "Pareho ta. Mag-unsa ka man didto?"
"Mangaplay unta ko'g trabaho kay wa pa gyud ko makatrabaho, sukad pa sa atong pag-graduate sa engineering. Ikaw, nakatrabaho kana?"
"Aw, kadaghan na man hinuon ko makatrabaho, pero kanunay lang starting position, pero wa may lain, sige na lang."
"Ako, Pare, tulo ka tuig na ko'ng way trabaho kay di ko mosugot anang starting position kay sugosugoon lang ta. Anugon ang atong pagka-gradwado."
Sa imo bang hunahuna, kanang anaa sa starting position dili gradwado?"
"Aw, hinuon, gradwado man sab na sila, pero di ka ba nag-expect og taas nga position?"
"Kinsa bay dili, o, sakay na ta ini, Pare."
"Di ko ana, Pare, aircon ang akong sakyan. Sayo pa bitaw, unya rang taudtaod."
Milabay ang usa pa ka oras, "Pare, di ka pa ba mosakay? Ma-late na ta sa interview. Ayaw palabi og pamili sa trabaho Pare kay tingali hibiyaan ka sa panahon, wa ka gayu’y eksperyensiya sa trabaho hangtod wa nay mokuha nimo, Pare kay nagka-edad ka na. Pareho lang na sa biyahe, Pare, nga kun mahutdan ta sa biyahe, wa na tay kasakyan."
"Tuod no, unya, unsa may imong plano, Pare?"
"Nga mosakay ta niining sunod nga biyahe aron makaabot pa ta sa interview. Kay kun magdugaydugay ka pa, wa nay kompaniyang mokuha nimo."
Naghunahuna pa si Poldo sa iyang angay buhaton.
"O, unsa na, Pareng Poldo, padulong na dinhi ang atong sakyan, parahon ko ba?"
"May katarungan ka, Pare, sige paraha kay manakay ta." (Katapusan)