Gula 10
“Ihatod tikaw sa inyo unya,” mipasidaan si Randy samtang nangaon pa sila. “Gusto sab kong mahimamat ang imong amahan. Dili ba miingon ka man nga kun mag-one year na ang atong relasyon, imo na kong ipaila ngadto sa imong Daddy?”
Wala dayon makatingog si Jody. Karon pa siya mahinumdom nga gisaaran diay niya si Randy nga ipaila na niya kini ngadto sa iyang amahan kun motangkod na nga usa ka tuig ang ilang relasyon.
Nahinumdom na si Jody karon nga dugay nang naghangyo si Randy kaniya nga magpaila na kini ngadto sa iyang amahan. Apan nagdumili siya sa hangyo sa iyang hinigugma. Suheto siya sa kinaiya sa iyang Daddy. Pilian kini og lalaki. Estrikto. Nabalaka siya nga tingalig masuko ang iyang amahan kaniya sa higayon nga dili niini magustohan ang ipaila niyang hinigugma.
Wala siya malimot sa gibaod ni Mr. Luis Garcia nilang duha ni Megan. Kinahanglang dili sila magpatuyang sa pagdawat og hinigugma. Kutob sa mahimo maglikay sila sa mga lalaki. Ug kun dili man gayod malikayan, kinahanglang pilion nila ang lalaki nga kasaligan ug buotan. Labaw sa tanan, kanang lalaki nga makagarantiya kanila og mahayag nga kaugmaon. -- Sumpayan pa