Gula 102
“Wa unta nimo dawata,” gibasol si Rosalinda ni Bongkoy dihang iya kining gisuginlan mahitungod sa singsing nga gihatag ni Atty. Gumera kaniya.
“Ako man bitaw’ng gibalibaran,” ni Rosalinda pa. “Pero namugos man gyud. Ako na lang gidawat kay nahadlok man ko nga masuko siya.”
“Unya, unsa na man sab kahay bugti niana?”
Wala motingog si Rosalinda.
“Gigamit na gyud ni Atty. Gumera ang iyang salapi sa paghaylo kanimo,” ni Bongkoy pa. “Gusto niyang ipakita nimo nga ikahatag niya ang tanan nga imong gusto nga mapalit og salapi aron modawat ka sa iyang tanyag nga pagpakasal kaniya.”
“D-dili, Bongkoy,” ni Rosalinda pa. “Dili ko magpakasal niya. Ikaw ang akong pakaslan tungod kay ikaw ang akong gihigugma.”
Ug naghilak si Rosalinda nga migakos kang Bongkoy.
Buntag sa adlaw’ng Sabado. Samtang namisbis si Rosalinda sa mga tanom sa luyong bahin sa balay ni Atty. Gumera, nabati niya ang andar sa makina sa sakyanan nga mibiya gikan sa garahe. Misantop sa iyang hunahuna nga milakaw ang iyang agalon. Ug kauban niini si Bongkoy kay ang ulitawo man maoy magmaneho sa sakyanan sa ilang agalon. -- Sumpayan pa