Alas singko sa hapon, sa usa ka behon factory dapit sa dakbayan sa Mandaue, human mo-punch out si Carding sa bundy clock, nidiretso kini sa iyang locker ug nag-ilis. Dalidali niyang gihubo ang iyang uniform pagka sikyo o security ug nag-ilis kini og t-shirt. Bitbit ang iyang bag nga maoy gisudlan sa iyang notebook ug libro maingon man bawon dali kining niangkas og nitindak sa iyang bisiklita padulong sa University of Cebu Main aron pagtambong sa iyang klase. Final exam ra ba nila karon.
Lima na ka tuig nga nag-alagad si Carding isip usa ka sikyo sa behon factory sa negosyanteng intsik nga si Tsar Lee Tsarona. Sa adlawan ang iyang duty isip usa ka sikyo samtang inig ka gabii nagtungha sa kursong Criminology. Dili sayon ang kinabuhi isip sikyo usahay mahimutang usab sa peligro ang kinabuhi. Dinhay usa ka higayon nga iyang nasakpan nga nagpalusot og tulo ka sako nga behon ang duha ka badlungon nga trabahante nga sila si Max ug si Paquito agi didto sa luyo nga bahin sa koral sa factory. Wala siya'y nahimo kun dili ang pag-report sa maong insidente ngadto sa management. Tungod sa dishonesty nataktak gayud sa trabaho ang duha ka buloyagon nga trabahante ug nagbahad kini nga manimalos ni Carding.
Gikan si Carding sa kabos nga banay ug kamaguwangan sa upat ka managsoon. Matag suweldo magpadalhanan kini og kuwarta ngadto sa iyang pamilya sa Dumanjug. Usa lang ka manananggot ang iyang amahan. Gusto niyang makapadayon og eskuyla sa high school ang iyang mga manghod nga sila si Rio, Oliver ug Longlong. Ang ilang kamanghuran nga si Longlong aduna ra ba gyuy potential kay pirmi man kining ma-honor sa klase. Aron gayud makadaginot ug makatigum si Carding, magbisiklita lang kini padulong ug gikan sa eskuylahan. Tempo nga tingpangaon pirmi lang mongos, batong o dili ba paleya nga tag singko pesos sa tabitabi ang sud-an niini. Nag-amping gayud siya sa iyang panarbaho abtik ra ba kaayo ang ilang mga inspectors sa 007 Security Agency nga sila si Bonnie Ingkong ug Harvey Loyoza nga manakop ug guwardiya nga magdukaduka sa puwesto. Daghan na kining gipangpotbol. Giisip sa ulitawo nga suwerte ug stepping stone ang iyang pagkasulod og trabaho isip sikyo.
Aron madungagan ang kita ni Carding, sa panahon sa iyang day off namaligya siya og newspaper sama sa Banat News, Freeman, Philippine Star maingon man cellphone load sa may south bus terminal.Lahi sa ubang mga batan-on nga lingawlingaw lang ang sulod sa ulo. Uyab-uyab, barkada, disco, inom, gimikan, fraternity ubp. Isip kamagulangan, nabatyagan sa ulitawo ang dakong responsibilidad nga kinahanglan iyang puniton og pas-anon. Siya ray bugtong paglaum nga makahaw-as gikan sa kalisud ang ilang pamilya. NO PAIN, NO GAIN. Motto sa marines nga maoy iyang gihimong gabayan sa iyang panlimbasog sa kinabuhi.
Sa ilang classroom gumikan sa kalantip ug pangutok ni Carding, daghang mga classmates nga babaye ang nakadayeg kaniya, usa na niini si Shaina maanyag ug gikan sa adunahang pamilya. Anak og chief of police sa ilang dapit. Sekreto nga gihimong inspirasyon ni Carding ang dalaga sa iyang pagtuon.
Duha ka semana human sa ilang exam. Sa may school lobby.
"Congrats Carding, ikaw ang ni top sa atong final exam. Sigurado na gayud ang imong pagka magna cum laude. Dili mo ba lang ko e-blow out." Si Shaina diay nga tam-is kaayo og pahiyom ang mitimbaya ni Carding.
Napugos pero malipayon si Carding nga ni-treat ni Shaina og snacks didto sa may Yucca's Refreshment atbang sa UC.Pero para niya dili pa kini ang tukma nga higayon nga mo give way siya sa iyang feelings ngadto sa dalaga basin mao kini ang makadiskarel sa iyang plano. Mag-unsa na lang ang kaugmaon sa iyang pamilya?
Moabot ra ang tukma nga panahon. Siguro kun makapasar na siya sa board exam ug makatrabaho na isip polis.
"There's place and time for everything under the sun." Ecclesiastes 3:1. (Katapusan)