Gula 81
“Mas maayo hinuon kay dugay na kaayo kong wa makakita niadtong bataa.”
“Nakakita ka na ba kaniya, Nang?”
“Sobra pas nakakita, Day. Dugay na gud ko dinhi.”
“Aw, tuod, no?”
“Ako gyu’y nag-atiman niadtong bataa sukad sa masuso pa kadto. Sayo man gud nga nailo sa inahan kadtong bataa. Duha pa lang siya ka buwan dihang namatay si Ma’am Melinda.”
“Sayo diay’ng nabiyudo si Atty. Gumera, Nang?”
“Mao gyud. Batan-on pa na siyang nabiyudo. Pero wa man hinuon na siya makahunahuna’g pangasawa’g usab kaniadto. Karon na hinuon nga tiguwang na, gusto na pong magminyo. Ug ikaw ra ba gyu’y nakursonadahan.”
“Saba diha, Nang, uy.”
“Kay di ba tinuod? Aw, kumosta na man tong iyang gitanyag nimo? Wa pa gyud nimo dawata ang iyang kondisyon?”
“Di ko makadawat sa iyang gitanyag, Nang.”
“Tungod ba kay dako’g gintang ang inyong pangedaron?”
“Usa sad na. Pero ang mahinungdanon gyung katarongan mao nga may hinigugma na ko. Si Bongkoy.”
“Wa ka ba mahinugon sa katigayonan nga imong maangkon kun dawaton mo ang iyang gitanyag?” -- Sumpayan pa