Nitugtog na usab ang mga paboritong musika ni Lando ning sayong kabuntagon. Gikan sa gamay niya nga portable cassette recorder nga iyang gipatong sa gamay'ng lamisita duol sa iyang ulohan.
Diha usab niini ang mga cassette tapes sa paborito niyang mga mag-aawit. Gikan ni Nat King Cole nga mipasikat sa “Love Affair”, Johnny Mathis “Misty, Frank Sinatra “My Way”, Matt Monroe “Born Free”, Paul Anka nga mikanta sa “DIANA”. Duna usab siya’y mga cassette tapes sa grupo nga “The Platters” nga mipasikat sa kantang “Only You”, Carpenter “We’ve only just begun” ug ang The Lettermen nga miawit sa “Theme from a summer place” nga maoy iyang gipatugtog karon. Mibangon si Lando sa gihigdaan niyang katre. Milakaw ug mipaduol sa bintana. Gitan-aw niya ang palibot sa gawas. Malinawon. Walay kisaw. Sama kamingaw sa iyang mga paboritong musika.
Unta kung ingon ini lang unta kamalinawon ang mga tawo sa kalibutan. Puno sa pagminahalay. Magtinabangay nga way mahayay. Magsinabtanay walay dumtanay ug malipay sa pagtinagdanay. Pagkanindot gyud unta puy-an sa kalibotan. Nakapangutana si Lando sa iyang kaugalingon kung gibati ba sab kini sa uban kung makadungog ning mga maanindot nga musika sa kanhiay’ng panahon nga iyang paborito karon bisan pa sa iyang kabatan-on.
Ningtuktogaok na ang mga manok. Tamailhan nga nagsingabot na ang banagbanag. Inanay nang mihayag ang langit gikan sa kangitngit sa kagabhion. Gibuak na ang kahilom sa kaadlawon ngadto sa kabanha sa kabuntagon. Nagkaupos na usab ang gibati nga kalipay ug mga imahinasyon ni Lando sa pagpaminaw sa iyang mga paboritong musika nga makapalinaw sa iyang hunahuna. Samotan pa sa iyang nadungog ug nakita sa gawas samtang nagdungaw siya sa bintana.
“Hoy ... Apyo! kaayo baya nimong mohimashimas anang imong manok hiniktan. Samtang ako gabii gibutdan na lang sa tiyan! Wala gyu’y usa sa imong mga kuyamoy nga mihimas sa akong kalawasan aron wad-on ang kalaay ning kalibotan! Di gani ko kaagwanta tulahon ko nang imong manok hiniktan! Sa asawa ni Apyo nga misurok ang dugo. Nagkupot kini sa silhig tukog kay nanilhig sa ilang nataran. Nagselos siya sa manok igtatari ni Apyo.
“Hoy ... Apya! paghilom diha! Gabiga-biga ka lang tiguwanga ka! Lusyang kana uy. Di kana nako mapuslan! Suwayi nyag tula kining akong manok hiniktan. Kay ikaw gyu’y akong itari sa buwangan batok sa manok,” ni Apyo, “ig- derby sa Barangay Talaga, lungsod sa Argao!” ni Apyo nga mipadayon paghapuhap sa iyang manok hiniktan nga iya pong giligo pinaagi sa pagbugwak sa giugom niyang tubig.
Wala na motiwas sa pagpanumbaling si Lando sa lantugi nila ni Apyo ug Apya, nga iyang silingan. Milingkod siyag balik sa iyang katre. Ug naminaw sa tokar sa iyang cassette. Ang “Somewhere” ni Matt Monroe.
There’s a place for us
Somewhere a place for us
Peace and quiet and open air
Wait for us somewhere
There’s a time for us
Someday a time for us
Time together with the time to spare
Time to learn, time to care
Someday, somewhere
We’ll find a new way of living
We’ll find a way of forgiving
Somewhere...
“Asa ko kayha makita dapita ang dapit nga puno sa pagkamalipayon. Puno sa gugma ug pagkamalinawon nga akong nabati sa pagpatugtog ko sa akong mga paboritong musika. Aduna ba kahay dapit dinhi sa kalibotan nga nindot puy-an sama sa langit?”
Pangagho na lang ni Lando ang mitubag sa iyang mga pangutana nga nagbuntaog sa iyang galamhan. (Katapusan)