Gula 57
“Nakasabot na ko,” ni Lonia pa. “And I take the challenge.”
“Good,” sa editor pa.
Kadiyot nga mipatunga kanila ang kahilom.
“Wa ka na ba masuko nako?” Sukit ni Rev nga miwakli sa kahilom.
Wala motingog si Lonia. Miduko siya sa atubangan ni Rev.
“Sorry sab sa akong nabuhat nimo,” matud ni Rev. “Nasayod kong usa ka dakong pagpangahas ang akong gibuhat nga pag...”
“Ayaw na kadto hisgoti,” sakgaw ni Lonia nga nakasabot nga maoy buot hisgotan ni Rev ang paghalok niini kaniya. “Tingalig may makadungog nato.”
“Gipasaylo na ba ko nimo?”
“Oo. Dugay na.”
“Salamat.”
Ug hingpit nga nagkauli ang maayo nilang kabubut-on.
Paggawas ni Lonia gikan sa opisina ni Rev, iyang naabtan si Mike nga nakigsulti kang Bernadith Medrano. Si Bernadith usa usab ka nobelista ug senior writer sa UCV Romances.
Gibiyaan lang ni Mike si Bernadith sa pagkakita niini kaniya. Misugat kaniya ang ulitawo.
Nasigpatan niya nga hait kaayo’g tinan-awan si Bernadith kaniya. Nanglimuok kini dayong sulod sa usa ka lawak. Nakasabot si Lonia kun ngano. Kaniadto ra siyang nakamatikod nga nakagusto kini kang Mike apan wala lang magtagad ang ulitawo sa gesture nga gipakita sa babaye.
Tingali nagselos si Bernadith nga nakamatikod nga nakigsuod si Mike kaniya.
“Unsay resulta sa inyong panagsulti?” Sukna ni Mike. -- Sumpayan pa