Dunay higayon nga mosibaw ang tingog sa wakwak panahon sa gabii apan alang kang Tadeo ang maong tingog sa wakwak usa lang ka natural nga langgam sa kagabhion. Sige gyung tingog ang wakwak matag Biyernes sa gabii.
Unya, ang maong tingog sa wakwak nahimong gikahadlokan dihang usa ka mabdos nga babaye gibalbal ug naapil ang gisabak niining bata sa iyang tiyan. Busa, ang tanan dinhi sa balangay nagtinir gyud og armas de fuego sama sa pistola, shotgun ug ripli. Ilang gibantayan ang pagtumaw sa tingog sa wakwak panahon sa gabii apan milabay na lang ang tulo ka buwan wala nay tingog sa wakwak nga mabati sa mga lumolupyo.
Usa ka mamalitay og alahas ang mitumaw sa ilang balangay ug sa pagkakita niya kang Ditas wala kini mahimutang. Ug nataymingan nga si Tadeo ang iyang gikahinagbo. Nagtabi silang duha ug ang ilang topic mao si Ditas, ang biyuda nga nagpuyo duol sa karaang kapilya.
Nindot ang balay sa biyuda. Dili gyud kini tal nga taga dinhi sa balangay sa Tubod. Matud pa taga Turotot kini si Ditas, usa ka isla nga sakop sa Tawitawi. Dinhi kini siya manimuyo kay naminyo kang Valintin nga taga dinhi sa Tubod ug didto ra kutob ang maong impormasyon, apan kining mamalitay’g alahas nga kalit lang mitumaw dinhi nasuheto kang Ditas.
“Ako si Baleleng ug nakatrabaho ko sa usa ka pawnshop didto sa Tawitawi,” niini pa ngadto kang Tadeo. “May giprenda kana siya didto nga alahas. Ug abi nimo no, ungo kana si Ditas kay ang alahas nga iyang giprenda didto sa pawnshop, nakapaukay namong tanan...”
“Nakapaukay? Kay ngano man diay, ha, Baleleng?” nahaiknat ang kilay ni Tadeo.
“Ambot lang kun motuo ka ba ini o dili ba, ang alahas ni Ditas nahimong kumagko sa usa ka bata,” hinay nga tingog ni Baleleng. “Ug among nahibaw-an nga may gibalbal nga mabdos nga babaye didto sa amo...”
Wala magdaghag pangutana si Tadeo sa mamalitay’g alahas kay dali ra niyang nasabtan ang tanan -- si Ditas mao ang mangtas nga wakwak nga mibalbal sa babayeng buntis dinhi sa ilang balangay.
Dala ang kalibri kuwarinta isingko nga pistola giatngan niya ang pagkanaog ni Ditas sa balay. Gitan-aw niya ang iyang relo depulso ug iyang nasayran nga pasado na alas otso sa gabii. Taudtaod may nanaog sa balay ug kay hayag kaayo ang buwan iyang naklaro nga si Ditas kini. Miduol dayon siya og hinay nga nagkupot na sa iyang kalibri .45 nga pistola. Gisangpit niya ang biyuda. Milingi dayon kini.
“Tadeo, ikaw man lagi ni, may tuyo ka nako?” ni Ditas pa nga mora’g misugod na pagkalkag ang mga buhok.
“Oo, nia ko aron taposon ko ang mangtas dinhi sa Tubod ug ang maong mangtas mao ikaw,” gi-cock dayon ni Tadeo ang iyang pistola ug gitumong niya kang Ditas.
Unya, lima ka nagsunodsunod nga mga buto sa pistola ang nadungog nga milanog ug mitig-ik si Ditas kinsa mihunat paglupad ug didto sa itaas sa balay nabati ni Tadeo ang tingog sa wakwak, “Wakwakkkk! Wakkkkk! Wakwak!” ug unya nahilom.
Pagka-ingon ugma wala na gyud mopatim-aw si Ditas. Ug may miingon nga si Ditas mibalik didto sa gamay’ng isla sa Turotot ug didto ra mamatay. (Kataposan)