Gula 47
Taudtaod siyang nagbarog sa iyang nahimutangan. Mora ba’g iyang gipaabot nga mogula si Bongkoy gikan sa lawak nga katulganan niini sa garahe. Apan wala gayo’y Bongkoy nga mitungha.
Wala sa hunahuna nga milakaw si Rosalinda paingon sa may swimming pool. Mibarog siya sa ngilit niini. Midungaw ngadto sa tin-aw’ng tubig nga nadan-agan sa sugang dagitabnon.
Taudtaod gayod nga nagbarog si Rosalinda sa ngilit sa swimming pool. Nalingaw siyang nagtan-aw sa tin-aw’ng tubig nga naigo sa kahayag sa sugang dagitabnon sa lagwerta sa balay ni Atty. Gumera.
Unya naigking si Rosalinda pagkadungog sa tingog sa usa ka lalaki nga nagsangpit kaniya gikan sa iyang luyo. Milingi siya. Si Bongkoy maoy nasugat sa iyang panan-aw.
Wala makasabot si Rosalinda sa iyang gibati. Mora’g misayaw ang iyang kahiladman pagkakita niya sa ulitawo nga miduol kaniya.
“Nganong nia ka man dinhi?”Gikan ni Bongkoy. “Wa ka pa diay matulog?”
“Wa pa ko batiag duka,” maoy iyang tubag. “Ikaw, nganong miapas ka man nako dinhi?” -- Sumpayan pa