Gula 33
Milabay ang duha ka semana. Mi-text si Rev Florentino kaniya. Gipangita na niini ang iyang mga nobela.
Gi-reply niya ang text ni Rev. Iyang gipasabot ang editor nga wala pa siya makahuman pagsulat. Bisan unsa na lang ang gibutbot niyang pamakak aron may ikapasangil siyang hinungdan kun nganong dugay niyang nahuman pagsulat ang duha ka nobela nga gipasulat sa editor kaniya.
Wala niya tug-ani sa matuod si Rev nga wala siya sa maayong kondisyon sa pagsulat kay may nakahasol sa iyang hunahuna mao nga wala niya matapos dayon ang gisulat niyang nobela.
Milundok na siya sa pagsulat. Gipaningkamotan niya nga mahuman na ang nobela nga iyang gisulat. Naikog na siya sa editor nga nangita na sa iyang sinulat. Misantop sa iyang hunahuna nga tingali nahibulong si Rev kun nganong dugay siyang naka-submit sa iyang manuskrito.
Karon man lang gud nahitabo nga dugay siyang nakahuman sa gisulat niyang nobela. Kaniadto, advanced kaayo sa deadline ang iyang submission sa iyang manuskrito. Karon lang gyud nahitabo nga nalangan siya tungod kay wala siya sa maayong mood sa pagsulat.
Nahuman ra gayod ni Lonia sa pagsulat ang iyang nobela sa kadugayan. Sa tantong pailob, paghinuktok, pagpiga sa utok, pagtukaw ug pagpulaw. Bisan naglisod apan natapos gayod niya pagsulat ang maong nobela. -- Sumpayan pa