Gula 28
Gipalong ni Bongkoy ang makina sa awto. Unya miligdong ang panagway niini nga mitan-aw kang Rosalinda.
“Nga-nganong nanghunong man ta dinhi?” Mikunot ang agtang ni Rosalinda nga mitutok kang Bongkoy.
“Magsulti una ta’g makadiyot,” nagkanayon si Bongkoy.
“U-unsa may atong panagsultihan?”
“I-I’m sorry, Ros. Nasayod kong dili kini ang tukmang dapit alang ning buot kong ipadayag kanimo. Pero kinahanglang masayod ka na niini.”
“Unsa man diay kana?”
Wala motingog si Bongkoy. Nanghupaw hinuon kini. Unya gipukpok niini ang manibela dungan ang pagpanlingo.
Kalit lang gipaandar ni Bongkoy ang makina sa awto. Gipadagan niini ang sakyanan.
“M-may panagsultihan man kaha ta?” ni Rosalinda pa.
“W-wa, Ros,” ni Bongkoy pa. “Hikalimti kadto. Dili importante ang buot kong isulti kanimo.”
Mibati si Rosalinda og tumang kahibulong sa gipakitang lihok ni Bongkoy.
Paghiabot nila sa balay, si Bongkoy midiretso’g saka sa taas sa balay. Milahos kini sa lawak ni Atty. Gumera. Si Rosalinda midiretso ngadto sa kusina. Naabtan niya si Tasing nga may gikuri-kuri. -- Sumpayan pa