Gula 7
Maoy nanumbalay sa iyang hunahuna si Daniel. Karon pa lang gani, gibati na niya ang tumang kamingaw ngadto sa hinigugma. Unsa kaha kun atua na siya sa siyudad diin hingpit na gayod silang magkalagyo si Daniel?
Matawag nga childhood sweetheart ni Rosalinda si Daniel. Katalirongan niya ang ulitawo. Suod silang managhigala sukad pa sa ilang pagkabata. Managsilingan sila. Suod usab ang masig nila ka ginikanan.
Dili man hamugaway ang kahimtang sa mga ginikanan ni Daniel apan mas bentaha pa usab ang ilang pagkabutang kun itandi sa iyang mga ginikanan. Klasmet sila si Daniel sa nagtungha pa sila sa elementarya. Sa higayon nga awayon ug bugalbugalan siya sa sipat nilang mga klasmet, si Daniel dayon ang manalipod kaniya.
Hangtod sa ilang pagka-ulitawo ug dalaga nagpabilin ang kasuod nila ni Rosalinda ug Daniel. Unya miabot gayod ang panahon nga nangulitawo si Daniel kaniya. Ug kay pareho man sila’g gibati sa usa’g-usa, nagkasabot ang ilang mga kasingkasing. Nagpanumpaay sila nga kamatayon ray makabulag kanila.
Apan karon kinahanglang isakripisyo una nila ang ilang gugma. Tungod sa kawad-on napugos si Rosalinda sa pagbiya sa ilang dapit aron manarbaho sa siyudad. Dili kini alang sa iyang kaugalingon, kondili alang sa iyang mga ginikanan ug mga igsuon. -- Sumpayan pa