Gula 121
Mibiya ko sa balay ni Roger. Maoy akong gidangpan si Galen. Didto na ko motipon niya’g puyo sa Mandaue. Gikalipay ni Galen ang akong pagbiya sa balay ni Roger. Sa kataposan, iya na gyud kuno kong ma-solo.
“Hinaot nga wa na tay masugatan nga problema sa kapulihay, Belen,” nagkanayon si Galen.
Apan usa ka adlaw niana, nakadawat ko’g masulub-on nga balita. Nadakpan si Galen sa kapolisan human kini nasakpan sa akto nga nagpayuhot og ginadiling drugas. Nagtingkagol na si Galen sa bilanggoan.
“Moeskapo ko gikan dinhi,” nagkanayon si Galen dihang nagkasulti kami sa akong pagduaw kaniya sa bilanggoan.
“Ayaw kana’g buhata,” giingnan ko siya. “Tingalig unsa unya hinuo’y mahitabo nimo.”
Pero gihimo gyud ni Galen ang iyang laraw pagpuga sa bilanggoan usa niana ka gabii. Ugaling lang kay wala siya molampos. Napusilan hinuon siya sa mga awtoridad nga migukod kaniya sa iyang pag-eskapo. Napatay si Galen sa mga awtoridad.
Dihang patay na si Galen, mibiya ko sa among gipuy-an sa Mandaue. Mibalhin ko’g puyo sa Pasil. Nag-abang lang ko’g kuwarto. Wala koy plano nga mopauli sa Bohol. Ingon sa hingpit nga nawad-an sa direksiyon ang akong kinabuhi human sa kalit ug paspas nga mga panghitabo. -- Sumpayan pa