Mahala sab nimo'g mga gamit, Bay, oy, matud ni Godoy kang Fredo nga nagtan-aw sa terno sa ulitawong guwang. "Ang kuwarta, Bay, lumalabay lang, busa samtang buhi pa ta, kay pareho ra man nga lumalabay lang ang kinabuhi ug ang kuwarta, atong pahimuslan, Bay."
"Hinuon Bay, dako ka man og suweldo ug ulitawo pa, makapahimulos ka gyud pagpanindot tan-awon sa imong lawas."
"Kining atong lawas, Bay, labaw pa ni's bulawan kay bisan unsa nimo kadaghan ug kuwarta kay dili na kinahanglan sa imong lawas, kay patay na, wa nay bili ang kuwarta.
Pananglitan, ang imong kamot maoy imong gigamit sa pagtrabaho ug mikita og husto, palite og nindot nga relo. Ang imong tiil gigamit mo adlaw-adlaw paglakaw, palite og nindot nga sapatos. Mahala gyud ang imong lawas kay mao kini ang imong bulawan o kaha labaw pa sa bulawan."
Milabay ang daghang mga tuig, didto na sa Manila si Godoy nagtrabaho. Sa napulo ka tuig nga panarbaho ni Godoy sa konstraksiyon, nga ang iyang sud-an kada adlaw mao ang ulo sa buwad nga dili kan-on sa iyang mga kauban, nakatigom gyud si Godoy og dako. Miduaw siya sa Cebu ug nagkita sila si Fredo.
"Oy, Bay Fred, komosta ka?'
"Giabot ko'g dimalas Bay. Maayo ka kay nanambok kas Manila, kuwartahan kana seguro."
"Aw, mora man ang kulang nato ba, kuartahan na man ta, hinuon sa akong pagpaningkamot sa Manila, duna gyu’y nahipos nga gamay. Ikaw nuon, kay daan ka man nga dako og suweldo. Pero nganong nidaut ka man og maayo, Bay?"
"Gidimalas lagi ko'g maayo, Bay, hurot gyud ang kuwarta nako Bay."
"Siyaro sad Bay, wa gyu’y nahibilin."
"Katapusan nakong bulawan, Bay, mao na lay nahibilin."
"Aw, naa pa man diay nahibilin nga bulawan, Bay, ibaligya na lang na."
"Di na man mahalin Bay."
"Ngano man nga di mahalin nga bulawan man na?"
"Gianay man Bay."
"Ha! Gianay-unsa mang pagkahitaboa?"
"Kining akong lawas, Bay, mao ang bulawan. Ug sa kadaghan sa akong sakit, gikan sa atay, sa tina-i, sa kasingkasing, sa prostate ug may dayabetes pa, lupig pay gianay nga bulawan Bay."
Pila lang ka buwan ang milabay, nahurot gyud og kaon sa anay ang bulawan ni Fredo. (Kataposan)