Gula 108
Misakay nako’g balik sa sakyanan ug gipaandar ang makina. Dihang misugod na ko’g padagan sa sakyanan, nakita ako si Bonner pinaagi sa side mirror nga mikaway-kaway kanako. Gisundan niya’g tan-aw ang akong gisakyan nga nagakalayo gikan sa iyang nahimutangan.
Pag-abot nako sa balay, nakadawat ko’g text gikan sa cellphone number nga wala marehistro sa phonebook sa akong cellphone. Pagbasa nako sa text, akong nasuta nga gikan kini kang Bonner. Gi-phonebook nako ang cellphone number ni Bonner.
Mao toy sinugdanan sa among pagbayloay og text messages. Pinaagi sa text nagtinug-anay mi sa among tagsatagsa ka estado sa kinabuhi. Sa iyang gitug-an nako, minyo siya apan bulag sa sawa. Tua na kuno nanimuyo sa Chicago, Illinois ang iyang asawa ug anak uban sa mga ginikanan niini. Pulos na kuno US citizen ang mga ginikanan sa iyang asawa ug wala nay planong mopauli sa Pilipinas.
Gitug-anan sab nako si Bonner nga “minyo” ko sa usa ka seaman nga si Roger. Wala nako tug-ani si Bonner nga dili ko kasado ngadto ni Roger. Sa akong pagtuo, wala na kini kinahanglana. -- Sumpayan