Gula 63
“Unsaon na man lang kun masayran kini nila ni Daddy ug Mommy?”
“Mao kanay labaw nakong gikabalak-an. Nasayod na kita sa kaestrikto sa atong mga ginikanan. May reputasyon silang giampingan. Nakaseguro kong dili sila makadawat sa higayon nga ilang masayran nga kita nga ilang mga anak maoy miunay pagduhig og lapok sa ilang kadungganan.”
“Wa sab ko magdahom niining hitaboa. Karon pa sab ko mahinumdom nga dulan na diay sa tulo ka buwan nga wa ko tunghaa sa akong regla. Wa untay bale kadtong nahitabo nato kun wa lang magbunga.”
“Wa na kita’y mahimo mahitungod niana tungod kay anaa na kana. Ang maayo natong buhaton mao ang pagpangita’g paagi nga masulbad ang atong problema.”
“Apan sa unsa man laging paagi?”
Naghunahuna si Evan.
“Unsa kaha kun atong ipa-abort kanang imong gisabak?” ni Evan pa.
“U-unsa?” Nakugang si Destiny nga ingon sa dili makatuo nga mao kadtoy mosantop sa hunahuna sa iyang maguwang.
“Ipakuha nato kanang bataa, Destiny. Kini lang ang bugtong paagi aron masulbad ang atong suliran.”
“Dili ko mosugot nianang paagiha, Kuya. Ikaw mismo nasayod nga dakong sala kanang gusto mong mahitabo.”
Nahilom si Evan. -- Sumpayan pa