Gula 38
Nianang pagkaugma, sila rang duha si Destiny ug Evan ang nahibilin sa balay. Ang ilang mga ginikanan mitambong sa usa ka kalihokan nga gipasiugdahan sa Couples For Christ. Ang ilang sulugoon milakaw sab kay nangompra.
Paggawas ni Destiny sa iyang kuwarto, mipaingon siya sa sala. Iyang natukmaan si Evan nga nagpasalida sa telebisyon. Nagtan-aw kini og dula sa NBA.
Miduol siya sa nahimutangan sa maguwang. Misibog kini’g diyotay sa gilingkoran pagkamatikod niini kaniya aron siya makalingkod. Mitupad si Destiny kang Evan. Unya gikuha niya ang remote control ug gipalong ang telebisyon.
“Hey,” badlong ni Evan kaniya.
“Sshh,” ni Destiny pa nga ang iyang tudlo gipatindog nga giali sa iyang baba, timaan nga dili na lang niya paangalon si Evan.
Wala na mo-ik si Evan.
“Buanga, no?” Nagtingsi si Destiny nga miatubang kang Evan.
“Ang unsa?” mikunot ang agtang ni Evan nga mitutok kaniya.
“Kadto gong nahitabo nato.”
“Ayaw na kadto’g hisgoti. Di na ko buot nga mahinumdom niadtong hitaboa.”
“Moingon ka lang niana kay lalaki ka man. Pero para nako, dili kadto daling kalimtan. Nawala gud ang akong virginity tungod niadtong hitabo.” -- Sumpayan pa