Gula 22
“Paita diay ning babaye ta,” nakaingon siya sa hilom. Dili man ta makapili sa atong magustohan. Mag-agad ra man ta kon kinsay manguyab nato.
“Sulayi lagi, Sis,” gikan na usab ni Evan. “Mahigalam lagi ka.”
Nahuman ang final exams sa first semester. Nianang pagkagabii, nangandam na sila si Destiny ug Evan sa ilang mga dad-onon kay nianang pagkaugma, mosayo sila’g biyahe. Mamauli na sila ngadto sa ilang lungsod sa Pinamungajan alang sa mubo nga bakasyon.
Matag tapos sa semester lang sila makapauli sa ilang lungsod. Dili mosugot ang ilang mga ginikanan nga magsige sila’g uli ngadto sa Pinamungajan tungod kay makaguba kini sa konsentrasyon nila sa pagtuon. Ang ila ganing allowance ug galastohan sa eskuylahan gipaagi lang sa ATM. Nag-apod og bank account sila si Evan ug Destiny.
Karon nga natapos na ang unang semester, naghinamhinam sila nga makapauli na usab ngadto sa ilang lungsod. Moistar sila didto sulod sa usa ka semana. Human sa pito ka adlaw nga bakasyon, mobalik na usab sila sa dakbayan sa Sugbu aron magpa-enroll alang sa second semester.
Wala pa mahuman si Destiny sa pagpanghipos sa personal niyang mga gamit sa dihang may nanuktok sa pultahan sa iyang lawak. Iya kining giablihan. Si Evan ang iyang nakita nga nagbarog didto sa gawas.
“May bisita ka,” ni Evan pa. -- Sumpayan pa