Ug imo lang ako nga pahuwamon og napulo ka libo ka pesos ... Igong, dili gayod ikaw mahigawad sa imong gipangindahay nga gugma kanako! diriyot sud-ipi og laway si Igong sa pagkabati sa gipamulong kaniya ni Imak.
"Kuwang pa gani kana nga kantidara nga ibayad ni Dr. Dawilo Alkantar, sa adlaw-adlaw niyang pagpakunsulta sa iyang kaugalingong klinika ning atong lungsod sa San Fernando!"
"Unsa man diay ang sakit ni Nanay nimo Oprit ... Imak, nga dako-dako man ang mabayad nimo sa adlaw-adlaw nga consultation ni Dr. Dawilo Alkantar?" misamot kabudlot ang simod ni Igong nga nagpakisayod sa iyang hinalaran.
"Grabe na kaayo Igong, ang sinaguysoy sa ubo sa akong inahan ug nagduda na gani si Dr. Dawilo Alkantar, nga mas mograbe pa kun dili madapatan dayon og mahalon nga tambal!" ni Imak pa nga midangoyngoy og bakho sa atubangan ni Igong.
Tibuok gabii ... way maayong kinatulgan si Igong. Nag-alindasay siya sa iyang gihigdaan nga lantay. Naghunahuna kun asa siya mangita og salapi ... nga nagkantidad og napulo ka libo ka pesos? Namurot na gani ang duha nila ka mata ni Nanay niya Ulang og binahog sa ona sa amahong, sa binuyok nga kan-ong mayok, nga adlaw-adlaw maoy ilang ipamahaw sa iyang inahan nga taudtaod na usab nga nabiyuda ni anhing Tatay niya Ponso.
"Unsa may nahitabo kanimo Igong, nga magbuntag na lang dili ka man makatulog?" ni Nanay pa niya Ulang nga nakamatikod nga siya mag-alindasay.
"Wa kini kaso Nay Ulang," dali niyang tubag.
Wa nay lain nga miabot sa hunahuna ni Igong. Gibaligya niya ang ilang kabaw nga kabilin pa sa naanhing niyang amahan.
Nahalin og siyam ka libo ka pesos.Ug aron pagtapar sa kuwang, hilom gibuak ni Igong, ang alkansiya ni Nanay niya Ulang, nga alang unta ipalit og pawod sa nipa nga isungkip sa nangalata nang atop sa ilang kusina.
"Salamat kaayo Igong," dihay kaparaygon sa tingog ni Imak.
"Balik ugma sa hapon Igong, ug anha na nimo mabati ang kabalaanon sa akong tingog ... nga ikaw na ang tag-iya sa akong kasingkasing!"
Wa pa gani manuktugaok ang manok nila ni Igong, timprano na siya nga miadto sa pinuy-anan nila ni Imak. Ambot unsang dimalasa ... nga mao na man lang ang nasawod niyang balita nga gitaban diay si Imak, ni Bartolo ... didto sa may bukiran sa Kampawog.
Igo lamang nakahagawhaw si Igong, diin siya nagkanayon:
"Mat-an pa sa pinya si Imak, apan wa makalihay sa dimalas nga nakigtaban sa usa ka lalaki nga minyo!" (Kataposan)