Gula 17
Sa kinauyokan sa kasingkasing ni Destiny, iyang natugkad nga wala gayod siya’y pagbati ngadto kang Devin. Hinigala lang ang iyang pag-ila ngadto niini. Dili niya katugbangan og gugma ang gugmang gihalad niini kaniya.
Milabay ang kapin sa usa ka semana. Nakamatikod si Destiny nga wala na dad-a ni Kuya Evan niya si Liz sa apartment nga ilang gipuy-an. Ngano kaha? Nakapangutana siya sa iyang kaugalingon.
Unya misantop sa iyang hunahuna nga tingali maong wala na ikuyog ni Evan si Liz sa apartment nga ilang gipuy-an aron paglikay sa iyang kasuko. Nagtuo siya nga sa gawas na lang mag-date ang duha mao nga kanunay nang magabhian ang iyang maguwang sa pagpauli.
Pipila na karon ka gabii nga sagunson nga lawom nang gabii nga mopauli si Evan sa apartment. Inigkabuntag iya kining pangutan-on kun nganong nagabhian kini pagpauli. Igo lang mongisi ang iyang maguwang ug moingon nga duna kini gitambongan nga outing uban sa mga klasmet niini.
Pero wala motuo si Destiny sa gisulti ni Evan kaniya. Nagduda siya nga nakigkita gayod kini og babaye. Kay diha’y higayon nga nakita niya nga may lama sa lipstick ang kuwelyo sa polo nga gisul-ob sa iyang maguwang. Misurok ang iyang dugo pagkakita niadto apan gikontrol niya ang iyang kaugalingon. Iyang gibati nga wala siya sa hustong lugar kun masuko siya gumikan lang sa iyang nakita. Kay may katungod ba gud siyang manghilabot sa lovelife sa iyang maguwang? -- Sumpayan pa