Akong nasuta nga may pagbati sab ko alang ni Galen. Pero misantop sa akong hunahuna nga kun sugton ko siya dayon, tingalig makaingon siya nga cheap ra gyud ko kaayo nga pagka-babaye.
Maong nagpugong ko. Wala dayon ko mopadayag sa akong desisyon bisan nakaseguro na ko nga dili gyud mapakyas ang iyang tuyo nako.
“Hatagi una ko’g panahon sa paghunahuna bahin sa imong proposal, Galen,” giingnan ko siya. “Di pa ko makadesisyon sa pagkakaron.”
“Andam kong magpaabot, Belen,” nagkanayon si Galen.
Pagkasunod semana, mibalik si Galen sa pagpamisita nako. Niining higayona, gidawat ko na ang iyang gugma. Labihan niyang lipaya nga gidawat ko na ang iyang gugma.
Ang akong mga ginikanan nga nakamatikod sa masubsob nga pagpamisita ni Galen nako wala makapugong sa pagpangusisa. Gitug-anan ko sila sa real score tali namo ni Galen. Nakugang sila pagkasayod nga nagkauyab na kami si Galen. Wala hinuon sila’y pagsupak sa akong pagpakig-relasyon kang Galen pero ila kong gipahimangnoan.
“Pag-amping, Belen,” ni Papa pa. “Hinumdomi nga dangog ang kalibotan. Tingali'g madakin-as ka...sama sa nahitabo nimo kaniadto.” -- Sumpayan pa