Kalit nga nahunong sa pagkusokuso si Minyang sa gilabhan nga longsleeve ni Ric. Naniga ang iyang mga mata nga nagtan-aw sa markang pula sa may kuwelyo sa maong biste. Gisusi niya kini pag-ayo. Morag agi sa lipstick.
Misaka ang dugo ni Minyang sa kasuko. Ang longsleeve nga iyang gilabhan gihagkan og babaye? Dunay babaye ang iyang bana? Kahilakon si Minyang nga naghunahuna niini. Gimahal kaayo niya si Ric, di siya gusto nga duna siya’y kabahin sa pagmahal mao bitaw nga giatiman gyud niya ang iyang lawas, nga magpabilin siyang seksi ug guwapa.
Lima ka tuig na silang naminyo si Ric, apan wa niya kini hatagi og anak kay di siya gusto nga maguba ang iyang figure, nga malusyang siyang tan-awon. Gusto niya nga siya lang gyod ang higugmaon ni Ric. Kanunay siyang mag-ehersisyo.
Maayo’g trabaho ug suweldo si Ric sa gitrabahoang opisina sa Mandaue. Dako kaayog sobra ang kita niini sa inadlaw nilang panginahanglan ug uban pang gusto nilang paliton. Hayahay ang ilang kahimtang bisag wala siya’y trabaho.
"Gibudhian ko ni Ric, Malou. May lain siyang babaye!" Naghilak si Minyang nga nagsugilon sa suod niyang amiga ug ilang silingan sa Consolacion. Mituyo gyod siya sa pagpakigkita sa iyang amiga sa balay niini.
"Segurado ka ba gyod, ha, Minyang?" Nakalitan si Malou kay sa iyang nasayran, buotan si Ric.
"Oo lagi!" Nagpamahid sa mga luha si Minyang ug gisulti ang iyang nakita sa longsleeve sa iyang bana.
"Mao ba?" ni Malou.
"Gawas niana, nakamatikod sab ko nga tagdugay nang mopauli si Ric gikan sa trabaho. Usahay lawom nang gabii." Naghingushingos si Minyang.
"Nganong wa mo man siya pangutan-a niining tanan? Asawa ka niya, Minyang. May katungod ka nga mopagawas sa imong gibati ngadto kaniya."
"Di ko gustong mahiubos siya nako, Malou. Basig masuko siya."
Nahilom si Malou. Mitutok siya pag-ayo kang Minyang.
"Unsay angay kong buhaton, Malou?" Mitibi na usab si Minyang.
"Nganong di mo man siya tagaan og anak? Boring ang magtiayon nga way anak."
Si Minyang na usab ang nahilom. Siya na usab ang mitutok pag-ayo kang Malou.
"Ang nakadaot gud nimo, Minyang, kay ang kaugalingon ra nimo ang imong gitan-aw. Gusto kang magpabiling guwapa ug seksi maong di ka gustong momabdos. Unya, wa nimo tan-awa ang kalipay sa imong bana nga gustong makakita sa iyang liwat."
Nanglabay ang mga adlaw. Malipayon na si Minyang kay sayo nang mopauli si Ric gikan sa trabaho. Dili na usab kini molakaw sa adlaw nga Domingo. Anha na lang kini sa ilang balay. Kanunay anaa sa iyang kiliran, nga wala niini buhata kaniadto kaniya.
"Pag-amping gyod sa imong lawas, ha, Minyang."
"Oo lagi. Ampingan ko kining imong umaabot nga anak sa akong tiyan." Mipahiyom si Minyang dihang gigakos siya ni Ric ug gihagkanhagkan sa aping ug mga ngabil.
Wala nay kaguol si Minyang. Nasayod siya nga siya na lang ang mahalon ni Ric tungod kay mahatagan na niya kini og anak. (Kataposan)