Gula 8
Pero gibabagan siya ni Evan.
“Have I committed anything wrong nga nakapasakit nimo?” Sa maguwang pa.
“Isumbong ta gyud ka ni Daddy kun di na ko makaantos,” mitingog na gayod si Destiny.
“I-isumbong?” Mikunot ang agtang ni Evan. “Bahin sa unsa?”
“Bahin sa imong gibuhat sa mga babaye.”
“Kay unsa ba diay akong gibuhat sa mga babaye?”
“Magpabuang-buang ka pa gyud. Kaingon ka’g wa ko masayod nga imong gidala si Liz sa imong kuwarto kagabii?”
“Ug unsa man naa niana? Wa man mi gibuhat.”
“Ayaw ko’g ingna nga nagrosaryo lang mo sa su’d sa kuwarto?”
“Unsay pagtuo nimo nako? Di makamaong mangadye?”
Naglagot si Destiny sa tinubagan ni Evan nga ingon sa gibugal-bugalan lang siya niini. Iya kining gihapak sa gibitbit niyang notebooks. Apan abtik nga nakasagang si Evan nga nagkatawa.
“Si sister baya, uy,” ni Evan pa. “Ngano ba gyung kontrahan man nimo kana si Liz?”
“Basta,” ni Destiny pa. “Wa gyud ko’y gusto nianang babayhana.”
“Pasagdi lang gud na siya. Di bitaw sab na siya nako tinud-on.” -- Sumpayan pa