Dinhi sa lungsod sa San Gabriel usa ray gikahadlokan sa mga lumolupyo ug kini mao si Asisclo, ang anak sa labing dato dinhi sa ilang dapit.
Isog gyud hinuon kini si Asisclo kay kausa niana nakakita man kini’g engkuwentro pinaagi sa duwelo sa pistola ug ang iyang gika-engkuwentro mao ang bagis sa lungsod sa Sta. Ines nga nadungog nang mamusil ug daghan na usab nga napusilan.
Nagkaabot ang duroha sa buwangan sa lungsod. Ug kay medyo dunay surambaw nga nahitabo sa pagtaod sa buwang ug unya dako kaayo’g pildi si Maximo, ang bagis sa Sta. Ines maong nag-wild kini sulod sa buwangan ug nagpabuto sa iyang pistola.
Nagdinaganay ang mga tawo sulod sa buwangan tungod sa kahadlok ug ang uban nangapakong ug nangasamad kay nangapiit ug nangadagma. Sa kalagot ni Asisclo iya kining gisakna og duwelo sa pistola -- ug nahitabo gyud ang pinusilay sa duruha ug nasamdan si Maximo bagis ug gidali pagdala sa hospital.
Tungod niini, daghan ang midayeg kang Asisclo sa kaisog niini ug maoy ilang gusto nga ila kining padaganon pagka-mayor dinhi sa ilang lungsod.
Dihang nagsingabot na ang piniliay ilang gihangyo si Asisclo nga maoy mobatok sa kurakot kaayong mayor nga si Beriko. Ug milampos si Asisclo kay siya man ang midaog batok sa kurakot nga mayor.
Ug karon siya na ang incumbent nga mayor sa lungsod sa San Gabriel. Pero, usa lang ka butang ang wala ganahi o maayoni sa mga tawo kang Asisclo kay manamparos kini basta duna kini kalagotan.
“Ka peligro baya kun kitay hitamparosan ni Asisclo, Pitoy,” ni Korak pa nga mora’g gibati og kabalaka.
“Tamparoson diay ka’g walay sala,” ni Pitoy pa usab nga kalmado kaayong mitubag sa iyang higala nga si Korak.
“Sus, kuyawa kun tamparoson ka ni Mayor Asisclo, no, bay Pitoy, labi na’g mahibawo kini nga nangulitawo ka usab ni Delia,” ni Korak pa nga nabalaka gyud sa sitwasyon sa iyang higala.
Amigo kaayo sila ni Pitoy. Bata pa sila suod na kaayo silang managhigala. Ugaling lang, gidungogdungog sila si Pitoy nga mga kaliwat og ungo. Apan alang kang Korak, wala man siya’y namatikdan nga makapaturok sa iyang katahap nga si Pitoy nahimo nang ungo kay lagi mga mangtas man ang iyang tatay ug nanay.
Tuod, usa ka gabii, hiabtan ni Mayor Asisclo si Pitoy didto sa balay nilang Delia. Guwapa man sad gud kaayo kini si Delia ug degree holder kay bag-o pa man nga migraduwar sa kursong BSBA kon Bachelor of Science in Business Administration.
Way suwerte si Pitoy kay dihang motindog na unta kini aron mopauli na human makapananghid kang Delia, giduol kini ni Mayor Asisclo ug gitamparos ug maayo kaayong pagkawingig ang nawong ug nasarasay paingon sa hagdanan ug kay kun wala pa kagunit segurado gyung mahulog sa hagdanan.
“Balik unya dinhi sa ilang Delia kay bala ang ilubong ko sa imong ulo,” ni Asisclo pa nga isog kaayong namulong ngadto sa ulitawo nga si Pitoy.
Wala na lang motingog si Pitoy ug dihang milakaw kini may gibilin kining usa ka hait kaayong tinan-awan sa mayor ug maayo lang gani kay wala makadiparal ang Mayor sa iyang pagtutok.
“Nganong imo mang gitamparos si Pitoy, Mayor, luoy kaayo siya. Naluoy baya ko kang Pitoy...” ni Delia pa nga nagluha ang mga mata kay sa hilom nakagusto siya kang Pitoy, ugaling lang, wala pa kini niya sugta.
“Dili ko gusto nga duna ko’y karibal nimo,” ni Asisclo pa nga mitutok sa matahom nga dagway sa dalaga.
Unya, pagkasunod gabii, kuyog sa iyang mga batabata, may mikalit pag-atang kanila ni Mayor Asisclo. Gibugno ang Mayor ug gikuniskunis ang tibuok kalawasan ug giapil pud niini ang duha ka mga batabata niini.
Pagka sayong buntag mao na lay nabalitaan ni Delia nga patay na si Mayor Asisclo kauban sa duha niini ka mga hinanib. Si Pitoy ang ilang gidudahan apan wala na kini sa ilang balay kay milayas na kini. (Kataposan)