“Relaks lang, Mr. Diolan,” matud ni Col. Antipon. “Wala kidnapa ang imong anak. Hinuon atua siya sa maayong mga kamot.”
“U-unsay buot mong ipasabot?” Mikunot ang agtang ni Mr. Diolan sa kalibog.
“Akong tawo ang gipasanginlan nga maoy nag-kidnap sa imong anak,” pasabot sa koronel. “Apan nasayod na ako sa sugilanon nga nagpaluyo niining maong hitabo. Ang isyu sa kidnapping salida lang nga gipaluyohan nila ni Col. Rivera ug sa usa ka Morris Sta. Ana.”
“Tabangi ko, Col. Antipon,” hangyo ni Mr. Diolan. “Dili ko buot nga mahulog sa mga kamot ni Morris Sta. Ana ang akong anak.”
“Ayaw lang kabalaka, Mr. Diolan,” alam-alam sa koronel. “Pangitaan nato’g paagi nga masulbad kining problemaha.”
Gipatawag ni Morris Sta. Ana si Col. Ver Rivera sa resthouse niini nga nahimutang sa barangay Sirao sa dakbayan sa Sugbu. May mahinungdanon siyang pakigsultihan niini.
“Wala pa gihapoy development, Mr. Sta. Ana,” matud ni Col. Rivera,” mahitungod sa pagpangita sa akong mga sakop nila ni Sandra Diolan ug SPO1 Bradley Mangubat.”
“Dili kana maoy akong tuyo karon kanimo, Col. Rivera,” nagkanayon si Morris.
“A-aw, u-unsa man diay, Mr. Sta. Ana?”
“Nanawag kanako ang atong kontak didto sa Mindanao. May laing shipment na usab siyang gipadala nganhi sa Cebu. Sa Dipolog City niya gisukad ang shipment ug modunggo kini karong gabii sa baybayon sa usa ka barangay sa Argao. Gusto ko nga mo-back-up kamo kanamo sa pagsugat sa maong mga kontrabando.” -- Sumpayan pa