Kusog nga nagdagan si Fred. Sa iyang tuong kamot hugot nga gigunitan ang selpon nga iyang gi-isnats gikan sa usa ka estudyanteng babaye didto sa Plaza Independencia. Sa dihang iyang nasuta nga walay migukod kaniya mihunong siya pagdagan ug naglakaw na lang nga mora la’g way nahitabo. Apan nagpanglingi gihapon siya.
Napugos si Fred pagbuhat sa ingon gumikan sa problema nga migumon sa iyang kaisipan. Ang iyang asawa nga si Lusing pipila na ka adlaw nga giubo og saguysoy kaayo ug nagkinahanglan og tambal apan wala siya’y ikapalit kay dugay naman lagi nga nawad-an siya’g trabaho kay ang kompaniya nga iyang gialagaran naigo sa kalibutanong krisis ug nanaktak og trabahante. Ug gumikan kay si Fred wala man makatapos sa high school usa siya sa napapha dihadiha. Bentaha unta kadto og nakatungha pa siya sa kolehiyo o nakatapos ba kaha sa high school kay may purohan pang magpabilin siya sa kompaniya. Apan nagligoyligoy man siya kaniadto sa dihang gipaeskuyla siya sa iyang Papa Nelson ug Mama Lina sa high school. Nagsige hinuon siya’g entra sa kontes sa sayaw ug gani siya pay tigtudlo og sayaw sa iyang mga kauban sa ilang grupo. Ang ilang grupo ilang ginganlan og U-EXTREME. Wala gani siya makahuman sa second year high school pareho sa iyang lolo.
Dugay nga gitutokan ni Fred ang selpon. Unya naigpot siya kay mihuni kini. Adunay nagteks. Iyang gibasa: ATE JAM2 PAULI DALI C CB GRABE HLANAT INIT KAAU. W PA MI KAON Y BUGAS. C MAMA NNGITAG KWRTA C PAPA W PA MOULI. C KUYA JAKE TUA ILA LOLO. -- AJ
Nahimut-okan si Fred. Nagtrokis ang iyang hunahuna. Gipigisan sa mga gumonhap. Iya bang idayon og baligya ang selpon aron may ikapalit siya’g tambal alang kang Lusing o iya nalang kining iuli sa tag-iya ug hangyoon kini nga dili nalang mosumbong sa polis.
Nahanduraw niya ang batan-ong babaye nga tag-iya sa selpon didto sa plasa. Sa wala pa niya labniha ang selpon niini iyang nakita nga masulob-on kining naglingkod sa lingkoranan nga medyo nasuok-suok. Naggunit sa selpon.
Nakonsensiya si Fred. Wala siya maanad niining buhata apan nahimo lang niya gumikan sa nagmasakiton niyang asawa. Ang ila ganing pagkaon iya lang giigo-igo sa masapi niya sa iyang pagpanuwat. Apan wala niya damha nga ang iyang nabuhatan sa ingon problemado sab diay!
Mibalik si Fred sa Plaza Independencia apan wala na didto ang batan-ong babaye. Nakahunahuna siya nga iyang ihatod ang selpon sa estasyon sa radyo nga nahimutang sa may Pier 1 duol ra sab sa Plaza Independencia. Iyang ipasibya nga ipakuha sa tag-iya nga si Jamjam, ug ipaingon lang sa announcer nga nakit-an ug gihatod sa nakapunit ngadto sa sibyaanan. Basig makapaminaw si Jamjam o kaha may makasulti niini aron iyang makuha pagbalik ang selpon. Masuta man gyod sa announcer kun ang tag-iya ba gyod ang mo-claim kay makapamatuod man kini’g unsay mga sunod sa SIMCARD.
Apan samtang naggunit sa selpon ug naglakaw paingon sa estasyonan sa radyo kalit nga naigpot si Fred. Dihay batan-ong lalaki nga misapipid kaniya ug gi-isnats ang selpon gikan sa iyang kamot ug tulin pa sa manatad nga misirit og dagan. Mogukod unta si Fred apan dali ra nga gilamoy sa kawalaan ang batan-ong lalaki. Delikado sab kaayo kay adunay mga backup kining mga snatcher.
Milingkod na lang si Fred sa daplin ug naghinuktok. Wa siya’y ikapalit og tambal alang kang Lusing. Ang tag-iya sa selpon nagpangita sab og tambal alang sa igsuon niini.
Apan.... (Kataposan)