Gula 72
Nalipay si Bradley kay may network coverage sa cellphone sa ibabaw sa bungtod. Gitawgan gilayon niya si Col. Cesar Antipon, ang iyang opisyal. Gusto niyang ikasulti ang iyang labaw aron ikapasabot niya ngadto niini ang iyang habig kalabot sa pasangil nga gikidnap niya si Sandra Diolan.
“Mangubat?” Nagkanayon si Col. Antipon didto sa pikas tumoy sa linya. “Ikaw ba kini?”
“Y-yes, Sir,” ni Bradley pa. “Ako kini.”
“Unsa bay nahitabo nimo? Hain ka karon?”
“D-dia ko sa layo nga dapit, Sir. Gikasubo ko nga dili ko pa ikatug-an kanimo ang eksaktong lokasyon. Ayaw lang laina pagsabot ang akong gisulti.”
“Nakasabot ko, Mangubat. Pero tinuod ba nga anaa sa imong mga kamot si Sandra Diolan?”
“Tinuod kana, Sir? Pero sayop ang nanggawas nga balita nga akong gi-kidnap si Sandra Diolan. Usa ka dakong pagbutangbutang ang gihimo ni Col. Rivera kanako. Ang tinuod, Sir, igo lang kong mitabang kang Sandra Diolan.”
“Unsay klaseha sa pagtabang?”
“Aron makalikay siya kang Morris Sta. Ana.”
“Wala ko ikaw hisabti, Mangubat?”
“Lisod kaayong ipasabot ang sitwasyon, Sir. Ug nasayod kong dili ka gyud makasabot sa akong concern mahitungod kang Sandra Diolan. Basta nga ang ako lang ikasulti mao nga wala ako’y gilapas nga balaod sa akong pagpanalipod ni Sandra Diolan.” -- Sumpayan pa