Naminyo na gyod si Fredmon nga ulitawong guwang, 57 ug si Lusing nga dalagang guwang, 56. Taudtaod na gyod siyang naninguha sa gugma sa babaye apan wala gyod magpakabana si Lusing kay kuno dili siya magminyo kay dili siya ganahan og kinabuhing samok. Alang kaniya ni Lusing samok ang kinabuhing minyo kay daghan kuno’g problema. Naglibog gani si Fredmon nganong ingon niini ang baroganan ni Lusing?
"Day Sing,pareho na tang mga guwang, aw matured diay, he-he-he. Angay na tingaling magminyo ta kay aron magtambayayong ta sa unsa may imong problema ug akoa. Kun dili ka magminyo kay daghag problema ang kinabuhing minyo, wala ka bay problema kun di ka magminyo? Karon wa ka bay problema? Timan-i nga tiguwang na kaayo ang imong mga ginikanan ug ang akong mga ginikanan. Busa kun magminyo ta, duha na unya nuon tang moatubang sa problema, di ba?"
Usa kadto ka higayon nga namisita si Fredmon kang Lusing mao kini iyang gipadayag sa babaye. Ug naigo gyod sa bulada ni Fredmon si Lusing kay misugot na gyod kini ug gikasabotan ang ilang kasal.
Haskang biboha sa kasal nila ni Fredmon ug Lusing. Nanambong ang iyang mga suod nga magsusulat sab. Sa paghisgot og pipila: sila si Bartolome, Javier, Oliver, Israel, Rodel, Melchor, Uriel, Joel ug Gally. Ug sa didto na sa balay ang kinasal.
Nagsugwak ang mga ilimnon nga gitudo pagpagawas ni Ingko Binog nga amahan ni Fredmon. Sige pa gihapon ang hikay sa mga kabanay ni Fredmon inabagan sab sa mga kabanay ni Lusing. Didto ra sa panimalay nila ni Lusing ang salusalo kay probinsiya lagi ug dili sama sa siyudad nga modayo’g dangop sa catering. Mao say gusto sa mga ginikanan ni Lusing ilabi na nga mga guwang na lagi sila nga usohon gihapon ang kinaraang kultura.
Si Melchor nga guwatsinanggo kaayo kinsa nagpuyo ra sab dili kaayo halayo sa ilang Lusing, sa dihang nakatubil na, mihunghong kang Fredmon: "Fred, makahimo pa kaha ka ngadtong Lusing rong gabii?"
"Sus, Chor ... bisag kapito pa!" Panganti ni Fredmon.
"Asa man mo mag-hanimon unya?" matud na sab ni Melchor.
"Kita ka anang payag sa unahan, Chor?" Gitudlo ni Fredmon ang payag nga nagtungkawo ilawom sa dakong punoan sa akasya. "Anha mi diha's Lusing magkombate rong gabii kay nia go's Tatay'g Nanay dinhi's ba'y. Maayo diha, Chor, way disturbo. Di gyod ko ni katulga's Lusing, he-he-he."
"Nangandak ka baya, Fred, tingalig nagtuo kang tin-edyer pa ka, he-he-he sad." Aron makita ang katag kinahanglang pauyogon gyod ninyo ang payag, ha."
Pagkaugma sa buntag sayo nga nahiagi si Melchor sa payag kay duna siya’y paliton sa tindahan sa unahan. Gituyo gyod niya nga adto moagi da'ng pangusyoso sa duha ka bag-ong minyo. Apan maoy iyang nabatian nga naglalis sila si Fredmon ug Lusing. Mipahipi siya sa punoan sa akasya ug naminaw.
"Ka-wa baya'y agi nato gabii, Sing. Abi ko ma'g mangundang lang ta'g manghapdos." Way kadasig nga namulong si Fredmon. "Naunsa ba diay na'ng imo nga napikot man?"
"Saba diha, Fredmon!" Misingka si Lusing. Unsay napikot nga ang imo ma'y nalukot!"
Midali'g sibat si Melchor ug didto sa layo mibahakhak og katawa! (Kataposan)