Gula 18
Sa laing higayon, nakita na usab ni Sandra kadtong maong amused nga pahiyom ni Bradley. Lahi ang gihatag nga kahulogan ni Sandra sa maong pahiyom.
“Kanus-a kaha nako ma-meet si Debra?” Gikan ni Sandra.
“G-gusto kang makighimamat niya?” Sukit ni Bradley.
“Yes. Naintriga man gud ko niya?”
“Ngano man?”
“Ambot lang. Basta kay interesado kong makigkita niya.”
“Ayaw kabalaka. Usa sa umaabot nga mga adlaw, ipailaila ko ikaw ngadto kang Debra.”
Nianang pagkaugma sa buntag, sayong nagmata si Sandra. Nindot kaayo ang iyang pagkatulog sa milabay nga gabii.
“Maayong buntag, Nang Diday,” timbaya ni Sandra sa inahan ni Bradley nga naghikay og pamahaw sa kosina.
Mibalos pagtimbaya ang lagas kaniya.
“Si Bradley, hain man?”
“Naa sa banyo, naligo. Mo-report na man kuno siya karon sa iyang trabaho.”
“M-mao ba?”
“Usa ra man gud ka semana ang gi-file niyang leave sa ilang buhatan. Ug ang pito ka adlaw niyang leave natapos na kagahapon.”
“Kun mao kana, Manang, mokuyog na lang ko nimo ngadto sa gidumala nimong restaurant.”
“U-unsa? Uy...mag-unsa ka man didto?”
“Motabangtabang nimo. Laay kaayo kun ako rang usa ang mahibilin dinhi.”
Sa sinugdanan, mibalibad si Nang Diday sa iyang gihangyo. Apan gumikan sa iyang pagpamugos, misanong si Nang Diday.
Pagkasayod ni Bradley sa gikasabotan sa duha, miuyon usab kini. -- Sumpayan pa