Gula 17
Nagsuroy-suroy sila sa Ayala. Human matagbaw, nanggawas sila ug nagpahatod na usab og taxi paingon sa SM. Nag-window shopping lang sila. Unya gikan didto, nagpahatod sila’g taxi paingon sa Colon.
Gumikan sa hangyo ni Sandra, mihapit sila sa restaurant ni Nang Diday sa Manalili. Dili kaayo daghan ang mga kustomer sa kan-anan niadtong higayona maong nakahigayon si Nang Diday sa pagpakighinabi kang Sandra sa makadiyot.
Gikan didto, gidala si Sandra ni Bradley ngadto sa Metro Gaisano. Apan nagtinagsok ang mga tawo sa maong department store kay naglusad kini og 3-day sale. Wala magdugay sila si Sandra ug Bradley sa Metro Gaisano. Milahos sila sa Elizabeth Mall.
Gikan sa Elizabeth Mall, nagpahatod sila’g taxi ngadto sa Robinson’s Place sa may Fuente. Ang kataposan nilang gisuroyan mao ang Mango Square.
“Nindot man diay ang Cebu,” nagkanayon si Sandra samtang nangisnak sila sulod sa Mango Square. “Tinuod gyud diay ang akong nadungog nga ang Cebu maoy ikaduha sa Manila.”
“Ang imong nakita mao lang ang mga dapit nga sayon ra natong maabot,” ni Bradley pa. “Daghan pang mga dapit sa Cebu nga wala pa nimo mataaki. Sagdi lang kay sa sunod higayon isuroy ko ikaw sa maong mga dapit.”
“Kanunay ba sab nimong isuroy si Debra sa mga dapit nga imong gidad-an kanako?” Daw wala sa hunahuna nga naluwatan ni Sandra ang maong pangutana.
“O-oo,” maoy tubag. “Ngano man diay?”
“Wala lang,” ni Sandra pa. “Curious lang ko. Ngano? May daotan ba sa akong pangutana?”
“Wala baya,” mipahiyom si Bradley. -- Sumpayan pa