Hain naman diay to imong kape nga pitaka ug clutch bag nga itom, Tatay Vencio? sukot ni Dinda sa iyang amahan. Karong Domingo sa buntag, namahid si Dinda sa iyang singot
sa nawong ug agtang sulod sa lawak sa balay sa iyang amahan.
Naglingkod si Tatay Vencio niya, 75 anyos, lima ka tuig nang biyudo, sa lantay sulod sa iyang lawak. Bag-o lang si Dinda nahuma’g pangukay sa mga tagoanan ni Tatay niya. Nangukab sa mga aparador sa lawak. Nangabli sa mga honos.
Nianhi si Dinda ining balay nga gidak-an niya sa Sibonga nga kaniadto kawayan lang ug amakan. Unya karon, usa na ka kongkreto nga bunggalo. Tungod sa tawag sa selpon ni Tatay niya nga nahurot na iyang kuwarta, nidalikyat dinhi si Dinda. Kay ang giwidro sa banko ni tatay niya nga sinto singkuwenta mil pesos, inubanan ni Dinda, nahanaw sama sa bula. Giwidro to kay nahadlok iyang Tatay Vencio nga masira ang banko tungod sa hitabo sa Legacy Group of Companies.
"Gamay na man lang kaayo akong kuwarta! Kini na lang!" ni Tatay Vencio nga nikuot sa pitaka sa iyang bulsa sa karsones ug gitunol sa anak. Itom ug bag-o ang maong pitaka. Kinse mil pesos ang sulod sa pitaka. Ug giukab ni Tatay Vencio iyang unlan. May laing kinse mil pesos sa ilawom.
Nakapanglingolingo si Dinda. Di na niya mapugos ang tiguwang pagpatug-an kun hain ang iyang daang pitaka ug clutchbag. Singkwenta mil ang sulod sa pitaka. Ug siyen mil ang sulod sa clutch bag. Di siya katoo nga nahurot to’g gasto sa tiguwang. Mao toy nahibilin sa bulto nga retirement benefits niya gikan sa GSIS ug SSS. Katloan man siya ka tuig nga drayber sa wa pa niretiro. Kinse ka tuig siyang drayber sa ambulansiya sa munisipyo. Ug kinse siya ka tuig nga drayber sa dekarga sa Ogninam Farms. Siya ang nigasto sa pagpabag-o sa ilang balay.
Karon lang nakahupot ang tiguwang og dakong kantidad. Mora’g gi-angu-ango sa kuwarta. Magpaibog siya’s mga tawo sa iyang kuwarta. Mag-ihap-ihap atubangan sa mga estambay. Di makasabot dayon kun sultihang ipahipos iyang kuwarta. Kay bungolbungol na.
Sa iyang pagpaningkamot, nakatapos og kurso tanan niyang lima ka anak. Inabagan sa tindatinda ni Sepa iyang kapikas sa buhi pa. Nasakit siya’g kanser sa matris ug wa magdugay kay way ikaabot si Tatay Vencio sa chemotherapy.
Sa kagamay sa iyang suweldo, daghang sideline iyang gihimo aron madugangan iyang kita. Niadtong nagtungha pa iyang mga anak, makawot niya ang di katol. Mangahoy siya aron ibaligya sa merkado. Mamanday siya sa higayong way trabaho. Manginhas. Manguma. Mamuha’g og dugos sa putyokan.
Nakahuman gyud iyang mga anak. Si Rose, kamaguwangan, Secretarial ang nahuman. Naminyo og polis. Tua na sa siyudad nanimuyo. Si Dinda, Accountancy. Usa ka CPA. Naminyo og negosyante’g kopras. Si Gina, HRM. Si Eva, Customs Administration. Ug si Roger ang kamanghuran, Criminology ang nahuman.
Si Tatay Vencio na lang nahibilin sa iyang balay. Kay nanaglain na’g puyo sa iyang mga anak. Apan sa niaging tulo ka bulan, may mga nipuyo sa balay uban niya. Sila si Greg anak sa pagkadalaga ni Gina. Si Aquilino manghud sa uyab ni Greg. Ug si Nadia nga uyab ug kapuyo ni Aquilino. Nia ni sila magkatulganan ug magkan-anan sa balay ni Tatay Vencio. Lakip sa katabang nga si Marites nga may uyab na sab nga magkatulganan sa maong balay. Suspek silang tanan sa pagkahanaw sa sapi ni Tatay Vencio.
Di man mahurot ang kuwarta ni Tatay Vencio kay diyes mil pesos may madawat niya kada bulan, gikan sa lima ka anak. Tagdos mil ilang tampohan. Ug may madawat pa siyang pension gikan sa SSS ug GSIS. May honorarium pa siya sa pagkakonsehal sa ilang barangay.
"Tay, ikaw ra gyu’y mabasol kun di na makit-an imong kuwarta. Nagsige ka man go’g paibog. May naibog gyud. Di, gikawat imong sapi!" ni Dinda. Blangko gihapon ang hitsura ni Tatay Vencio. Either limot siya o nagpatosotoso lang.
Nakahukom si Dinda nga tawgon sa selpon si Rose. Iyang isugyot nga ipa-imbestigar sa pulis ang pagkawala sa kuwarta ni Tatay Vencio. (Kataposan)