Hilabihan nakasarap og higop ni Pasyo, sa nangalisngaw pa sa kainit sa sabaw sa utan, nga gitagana kaniya ni Ulang. "Maulian ka na gayod sa imong hilanat Pasyo, gikan sa gi-espesyal kong utan ... nga pinatuyo ko og luto aron ikaw mahuwasan!" ni Ulang pa nga misamot kalisngag ang ilong samtang namulong.
"Tanlas gihapon higopon ang sabaw sa utan, bisan way subak, kay nangalisngaw gihapon sa kahumot gikan sa tangad!"
Tangkod gayod nga usa ka semana nga wa makapamasol og isdang til-ogon, nga ilang isuwa ni Ulang. Unsaon sa kabag-ohay pa god nilang gikasal ning ilang dakong simbahan sa lungsod sa San Fernando, wa man gayod sila makapugong sa ilang kaugalingon ang nag-awas-awas nilang kahidlaw.
"Tan-awa Pasyo ... unsay nahitabo kanimo, nga gumikan sa naghinobra mong pagdigamo kanako, meresulta hinuon nga ikaw gihilantan?" ni Ulang pa nga may tuno ang sinultihan og sudya.
Wa na lang tubayi pa og tubag ni Pasyo, ang iyang asawa, nga sama kaniya usa na usab ka tiguwang. Ning ila god nga balangay sa Kapangian, wa gayo’y nagdahom sa ilang mga silingan nga silang duha magkadayon ba diay nga magka-minyoay? May kalim-an na god ug siyam ang panuigon ni Pasyo, samtang si Ulang, sobra pa sa nalapas sa kalendaryo kay may kan-uman na man ug duha ang kagulangon?
"Belib na belib gayod ako nimo Ulang, nga mas maguwang man unta ikaw og gamay kanako og edad ... nakasustenir pa man gihapon og kumbate sa atong lantay sa may sulod sa atong sibay?" ni Pasyo pa nga nagtangkihod sa paglakaw.
"Buyag intawon Pasyo!" mubong tubag ni Ulang.
Adlaw kadto nga Sabado. Nahaponan sa pagpauli si Pasyo, nga gikan nga namasol. Nagsangkiig siya og alsa sa iyang mga kuha nga isda, nga pulos til-ogon. Gituwa ni Ulang og hurot.
"Wa man ako ganahi nga mohigop sa sabaw sa imong gituwa Ulang?" mikulima ang nawong ni Pasyo.
Makadaghan na kadto buhata ni Ulang, ug kanunay sinubakan og til-ogon nga isda nga kuha sa pasol ni Pasyo. Apan wa lang gihapon ganahi nga mohigop ang iyang bana? Ngano kaha?
Kilomkilom kadto. Nauli gikan sa dagat ang iyang bana nga way kuha. Maayo gani nga nakautan na si Ulang, nga way subaksubak.
"Diriyot matikay-ang si Ulang, nga nagsud-ong sa iyang bana nga gipaningot sa kalami sa sabaw sa iyang giutan.
Nagpabilin kadto nga tinagoan sa ilang panagtipon, nga kun wa gani isda nga ika-subak sa utan ... sabawan og ihi ni Ulang, aron lamian og higop si Pasyo. (Kataposan)