Gula 83
“Denia, ang gihunahuna ni James mao ang imong kaayohan,” mitabang sa pagpasabot si Mrs. Ricarte kaniya. “Ang imong kabulahanan ug kaugmaon.”
“Dili ko mamikot og lalaki, Ma’am,” ni Denia pa. “Gusto kong ihatag kang James ang kagawasan aron pagpangita sa babaye nga maoy angay niyang higugmaon ug pakaslan. Wala kami relasyon. Ang nahitabo tali kanamo maoy resulta sa akong kahungog. Nahitabo kadto tungod kay wala nako gamita ang akong utok.”
“Dili importante kun may relasyon kamo o wala,” pasabot ni Mr. Ricarte. “Ang mahinungdanon mao ang paghatag og justification sa nahitabo kaninyo.”
“Nia kami,” ni Mrs. Ricarte,” aron pag-offer kanimo nga pakaslan si James. Kini ang gusto niyang mahitabo.”
Ang gisulti ni Mrs. Ricarte nakapatandog sa iyang emosyon. Wala niya kapugngi ang pagtibi sa iyang baba ug ang pag-agas sa iyang mga luha.
“Gusto ni James nga mokuyog ka namo balik ngadto sa Cebu,” matud ni Mrs. Ricarte.” Kun mahimo ikuyog na usab nato ang imong mga ginikanan aron mahikay gilayon ang tanan alang sa inyong kasal.”
“Dako nakong dungog nga bisan sa akong kakabos miabot kanako ang offer nga ingon niini,” ni Denia pa nga nagpamahid sa iyang mga luha. “Apan gikasubo ko, Ma’am,” dili nako madawat ang inyong gitanyag.” -- Sumpayan pa