Naliwat si Shirley sa iyang amahan nga si Noy Kadong, nga mahiligon sa buwang. Daghan og mga hiniktang manok nga igtatari si Noy Kadong. Mokuyog gyud si Shirley sa iyang amahan kun magtari kini’g manok sa buwangan sa ilang lungsod sa Santa Fe. Mora sab og tomboyon si Shirley. Si Rico ra ang nangahas sa pagpaninguha sa gugma sa dalaga. Isog nga pagka babaye si Shirley. Apan guwapa ug nindot ang iyang lawas.
Nagtungha siya sa pagka-maestra sa siyudad. Magpaulian mata’g Sabado sa gabii. Ug kay Domingo man ang buwang sa ilang lungsod, maong makakuyog gyud siya kang Noy Kadong sa buwangan kun magtari kinig manok.
Karon kay Domingo, mikuyog na sab si Shirley sa iyang amahan sa pagpanari. Puwerteng suliyaw sa dalaga kun makapabor ang ilang manok. Miabiba siya pag-ayo sa ilang manok. Ug nakabuno o nakadaog gyud ang ilang talisayon.
Mga maayo’g manok igtatari si Noy Kadong. Tag-as og dugo. Maayo sab og pagkaon ug mga bitamina. Dako’g kayutaan si Noy Kadong sa ilang lugar. Giila siyang adunahan sa ilang lungsod.
Malipayon kaayo si Shirley nga nagbitbit sa bihag. Dako kaayo siya’g ngisi. Pag-abot sa ila, gilat-an dayon niya ang bihag. Gipaningot siya sa paghinigop sa naglasalasang sabaw ug pagkitkit sa paa. Biyudo na si Noy Kadong. Tulo na lang silang nagpuyo sa dako nilang balay. Si Noy Kadtong, si Shirley ug ang ilang katabang.
Unya, samtang nagpahayahay si Shirley sa ilang sala, nahiabot si Rico. Way maayong buot si Shirley nga miatubang sa ulitawo.
"Kagahi baya nimong sultihan, Rico, nga hunong na sa pagpangulitawo nako." Pinabundak ang tingog sa dalaga.
"Di ko mohunong, Shirley, kay gimahal tika pag-ayo." Morag nagpakiluoy ang ulitawo sa dalaga.
Tulo na ka bulan nga nangulitawo si Rico kang Shirley. Guwapo si Rico, nindot ug bus-ok ang lawas. Maayo sab nga pagkabutang ang iyang mga ginikanan sa ilang lungsod sa Santa Fe. Nagkuha siya’g Mechanical Engineering sa siyudad.
"Sige. Niay maayong paagi, ay. Magtari tag manok. Hiniktan ni Papa Kadong ug hiniktang manok sa imong Papa Gusting. Kun mapilde ang manok sa imong amahan, ayaw na pagpadayon sa pagpangulitawo nako. Kun makadaog kini, aw, uyab na ta. Trato na ta."
"Sige. Game ko anang paagiha."
Sugarol sab og manok ang amahan ni Rico. Maayog klase sab ang hiniktang mga manok nga igtatari niini. Ug miabot ang adlaw nga Domingo. Gituyo gyud nila ni Shirley ug Rico nga ang manok sa ilang tagsatagsa ka amahan ang magkontra. Balaw ang balhibo sa manok nila ni Rico. Ug pula ang ilang Shirley.
Dihang gibuhian na ang duha ka manok sa sulod sa ruydahan, puwerteng abiba sa dalaga sa ilang manok labi na nga nagtakiang na ang balaw. Unya gikupogan sa pula ang balaw. Mibalos sab sa pagkupog ang balaw. Sa nadugay na, himatyon na ang balaw. Nakaluksolukso si Shirley kay naneguro na siyang makadaog ang ilang manok.
Apan kalit nga nahilom si Shirley uban sa kusog nga suliyaw sa mga tawo nga nakapusta sa balaw. Mikalit pagdagan ang pula. Mingisngis. Mikakak. Naminghoy si Shirley nga mitan-aw kang Rico nga didto sa iyang atbang. Malipayon kaayo si Rico.
Sa pagka-gabii, nag-inom si Noy Kadong ug Noy Gusting sa tugkaran nila ni Shirley. Malipayon kaayo sila. Samtang sa itaas sa balay, sa sala, wa makasupak ang dalaga dihang gihagkan siya sa mga ngabil ni Rico. (Kataposan)