Gula 66
Nakaamgo dayon si Denia. Gikinahanglan niya ang salapi nga gitanyag ni Mrs. Ricarte kaniya. Unsaon niya pagpauli ngadto sa Bohol kun wala siya’y kuwarta?
Gidawat niya ang kuwarta gikan ni Mrs. Ricarte.
“D-daghang salamat niini, Ma’am,” matud ni Denia.
“Way sapayan,” giubanan og hilaw nga pahiyom ang tubag sa agalon nga babaye.
“Ikaw na lang ang maantigong mopasabot ni Sir Manolo sa tanan.”
“Ayaw kabalaka. Ako nay bahalang mopasabot kaniya. Ug kun ugaling mausab ang imong desisyon, ayaw kataha sa pagbalik dinhi. Andam kami kanunay sa pagdawat kanimo. Gikahinugon ko ikaw, Inday, tungod kay buotan ka nga pagka-babaye. Ang sama kanimo lisod nang igkita karong panahona.”
Wala na motubay si Denia sa gisulti ni Mrs. Ricarte. Nanamilit na siya ngadto niini.
“Pag-ayoayo,” matud sa agalon nga babaye. “Ug pag-amping sa imong pagbiyahe.
Nanaog dayon si Denia ngadto sa silong. Milahos siya sa kusina aron pagpahibalo kang Nang Luding nga mopauli na siya ngadto sa Bohol.
Sama kang Mrs. Ricarte, nakugang usab ang lagas sa kakalit sa iyang desisyon. Nakalitan pag-ayo si Nang Luding.
“Unsa man diay gisangpotan sa panagsulti ninyo ni James kaganina?” Sukit sa lagas. -- Sumpayan pa