Naglisod paghukom si Denia. Ang tinuod, wala niya itanom sa iyang hunahuna ang pagpangulitawo ni Allan kaniya. Mao kini ang hinungdan nga dili pa siya andam sa pagtubag sa mga pangutana niini sa ilang panagsulti pag-usab.
“May paglaom na ba ang akong gugma, Den?” Misukna si Allan.
“D-dili pa ko maka-decide karon, Allan,” matud ni Denia.
“Sa unsang hinungdan?”
“K-kuan...dili pa ko andam nga makigrelasyon pag-usab. Human sa kapakyasan sa duha nako ka gugma, nakahukom kong itingob una ang akong panahon sa trabaho aron makatabang sa akong mga ginikanan.”
“Dili ba diay mahimo nga ipadayon mo ang pagtabang sa imong mga ginikanan ug sa samang higayon umolon nato ang usa ka relasyon?”
“M-mahimo man. Pero sa gikaingon ko na, dili pa ko andam nga makigrelasyon pag-usab. Gusto kong magpuyo una og kinabuhi nga free sa bisan unsang commitment. Gusto kong way laing hunahunaon gawas sa akong trabaho.”
Nakasabot ko sa imong tumong, Den. Sagdi lang, andam kong magpaabot hangtod nga moabot ang higayon nga ready ka na alang sa laing commitment.”
“Sa pagkakaron malipayon ko sa akong kinabuhi bisan zero ang akong lovelife. Wala pay kaseguroan kun kanus-a ko mahigugma pag-usab.”
Apan ang labing ligdong nga katarongan mao nga natugkad na ni Denia nga wala gayod siya’y pagbati bisan gamay alang kang Allan. Wala siya mahigugma niini. Kutob lang sa panaghigala ang iyang pagtagad sa ulitawo. -- Sumpayan pa