Gula 28
“Lahos una sa akong lawak,” ni Nang Luding pa. “May ihatag ko nimo.”
“U-unsa man, Nang?” Nangutana siya.
“Sunod lang gud nako,” sa lagas pa.
Wala na lang siya magdaghan og langas. Misunod siya ni Nang Luding paingon sa lawak niini. Misulod sila sa lawak sa lagas.
Nakita ni Denia nga mipaingon si Nang Luding sa kabinet sa didto na sila sa sulod. Gipagawas sa lagas gikan sa kabinet ang usa ka butang nga giputos og gift wrap. Mibalik kini pagduol kaniya nga nagdala na sa maong butang.
“Para ni nimo,” sa lagas pa nga mitunol kaniya sa gibitbit niini.
“U-unsa man kini, Nang?” Sukit ni Denia nga midawat sa gitunol ni Nang Luding.
“Ambot lang. Basta kay gikan kana ni Allan. Gisekreto kana niya’g hatag nako kaganina sa pag-abot nila ni Mr. Ricarte. Namalihog siya nako sa paghatag niana kanimo.”
Wala motingog si Denia gigunitan niya ang regalo nga iyang gigunitan. Wala siya nagdahom nga makadawat og gasa gikan kang Allan.
“Dili na gyud ikalimod, Day,” ni Nang Luding pa. “Klaro na kaayong nakagusto kanimo si Allan.”
Wala motubay si Denia sa gisulti sa lagas.
Giablihan dayon ni Denia ang gift wrap sa didto na siya sa sulod sa iyang lawak. Gisusi niya kun unsay sulod sa kahon nga gisudlan sa regalo ni Allan alang kaniya. Nasuta niya nga chocolate ang sulod sa kahon. -- Sumpayan pa