Gaw! Ha-ha-ha! Naigpot ko sa dihang dihay kalit nga misangpit nako samtang nagbarog ko sa gawas sa Gaisano Main, nag-atang og jeepney para sa Pier 3. Gikan man gud kong mikobra sa honorarium sa akong mga sinuwat nga nangapatik sa Banat News ug may gipalit ko sa Gaisano sa wala pa ko modesider nga mopauli na sa Opon.
Sa akong paglingi maoy mihimamat sa akong panan-aw ang siaw kong ig-agaw nga si Fred Monterola. Nagtingsi baya nga 'kanahan' nga miduol nako. Pareho kaming duha nga ang masigka pamilya atua sa probinsiya ug kami mihupot sa siyudad aron manuwat sa mga mantalaan ilabi na sa Banat News.
"Diin man gikan, Gaw? Ha-ha-ha!" ni Agaw Fred pa.
"Didto ko's opisina sa Freeman, Gaw, nananggi."
"Aw, mabasa diay'ng wait ta ini, ron? Ha-ha-ha!"
"Aw, suma ba. Kining ikaw, Gaw, diin man sad ka gikan?"
"Didto pod ko's Freeman, Gaw. Wa lang ta mag-abot da."
"Mao ba? Samot diay'ng kabasang wait ta ani? Asa man ta ron?"
Gihunghong ni Agaw Fred ang iyang tubag.
"Uy, matay, andar na sang kahigal nimo, Gaw, da, he-he-he."
Didto mi sa Israel's Paradise nagpainit sa dunggan ug nanan-aw og hubo-hubo. Padulong na man gud sa kasadpan ang adlaw ug ning mga taknaa nangabli na ang Israel Paradise. Sayo nga moabli ang maong balay-kahilayan nga gipanag-iya sa usa ka langyaw nga si Isra Elñez ug sayo sab manayaw ang mga dancer.
Sa dihang nakapundok na mi’g pipila ka basiyo sa 'pulang kabayo'...
"Gaw Ram," gidagpi ni Agaw Fred ang akong abaga."
"Nga-ngano, Gaw?"
"Short time ta."
"U-unsay short time, Gaw?"
"Bida, uy. Kita ka anang nagsayaw nga nagbikini na lang?Ha-ha-ha!" Ug gipabudlot ni Agaw Fred ang iyang simod tumong sa sexy dancer nga naghiyod-hiyod nunot sa sonata.
"Kita mo lang."
"Mahimo man na’g atong saboton ba. Mada ra man gani nag kinyentos. Dako-dako man kaha ta’g nakobra ron? Ha-ha-ha!" ug mitingsi ang bilyako nga writer nga di makakita-kitag paa sa babaye dayog tubod ang laway.
"Ayna lang kog tentala ana, Gaw. Kining akong nakobra ron ako ning iplete's Negros ug ang uban akong i-remit ni sismi inig-abot nako didto."
"Matay, Gaw ... pada na lang ug ang imong iplete unta nga ibutang ta na la’g usa ka libo bak and port plas sima-sima, idugang na lang ang kinyentos, ug ang mahibiling kinyentos para sa tsiks sa Israel's Paradise. Di, madugangan pa ang imong igreremit ni Maylinda ug kun bug-at na gyong imong tumoy, 'makapahungaw' gihapon ka pinaagi's tsik sa Israel's Paradise."
"Ba diha, Gaw, uy. Ang kasiaw mo lang gyud. Bahala na ka diha. Una lang ko’g gawas nimo, uy."
Sa akong pagbalik sa Cebu misuroy ko sa gipuy-an ni Agaw Fred sa Lorega. Unya maoy akong naabtan ang akong ig-agaw nga nangihi sa may poste. Apan dako ang akong kahibulong kay nagping-it man kini sa hilabihang kasakit samtang nagkaang-kaang og lakaw.
"Uy, Gaw Fred? Naunsa man ka?"
"Matay, Gaw Ram... high voltage man diay tong babaye didto's Israel's Paradise..." Ug miping-it na sab si Agaw Fred. "Ubay-ubay na ang tambal nga akong natomar apan wa pa gyo’y alibyo."
"Butangi!" Nakatuaw ko. "Gaw Fred... kun ang kinyentos nga imong gibayad sa tsik sa Israel's Paradise, imo pang giplete sa Caduawan diin tua si Lusing nga imong asawa, 'makapahungaw' unta ka nga wa gyo’y peligro!"
Wa na gyod mokatawa si Agaw Fred. (Kataposan)