“Taga diin ka man diay?”
“Taga Bohol.”
“Taga Masbate sab ko.”
“Kun dili pa lang tungod sa kawad-on, dili gyud ko gustong mahilayo sa among dapit.”
“Pareho ta’g katarongan. Kawad-on usab ang nag-aghat kanako nga manarbaho. Ako'y breadwinner sa among pamilya.”
Wala motingog si Denia. Apan sa gisulti sa lalaki, nasuta niya nga responsable kini nga pagkatawo.
Pagkaugma si Denia gihapon ang naghatod sa pagkaon ni James. Taud-taod na siyang nanuktok sa pultahan apan walay miabli. Natulog pa kaha si James!
Miusab siya sa pagpanuktok nga giubanan sa pagsangpit sa ngalan ni James. Apan wala gihapoy mitubag kaniya.
Gisulayan niya pagliso ang doorknob sa pultahan. Abiyerto kini. Maong gihinay niya pagtukmod ang palid sa pultahan ug misulod.
Wala si James sa sulod sa lawak. Apan nakita niya nga nagsiga ang suga sa banyo nga diha ra usab sa sulod sa lawak sa ulitawo. Nabati niya ang linagasak sa tubig nga naggikan sa shower. Naligo diay si James mao nga wala kini makadungog sa iyang pagpanuktok ug pagsangpit.
Gipahimutang na niya ang mga pagkaon sa ibabaw sa lamesa. Mogawas na unta siya sa lawak sa ulitawo dihang nabati niya nga miigot ang sera sa pultahan sa banyo. Nahalingi siya. Maoy misugat sa iyang mga mata si James nga nagtapis lang og tualya. -- Sumpayan pa