Gula 47
Gipahinumdoman si Abigail ni Vonna mahitungod sa pagpasakit ni Krista kaniya. Kadtong higayon nga gitamparos siya niini sulod sa school campus diin daghang mga estudyante ang nakakita sa maong hitabo.
“Nag-reconcile na man mi ni Krista,” giingnan ni Abigail si Vonna.“Nag-sorry na siya nako ug gipasaylo ko na siya.”
“Gipasaylo mo lang siya sa dakong kasayon?” Sukmat ni Vonna.
“Wa ko magdumot niya. Di maayong magtanom ta’g kayugot sa atong isigkatawo kay di ta makabaton og peace of mind. Wa sab gyud ko’y plano nga manimawos kang Krista. Igo na para nako ang disciplinary action nga gihimo sa tagdumala sa tulonghaan batok niya.”
“Belib ko nimo, Day. Talagsaon ka gyud. Kun ako pa tingali gibuhatan ni Krista sa ingon, di gyud ko magmalinawon kun di ko makabawos.”
Wala na tubayi ni Abigail ang gisulti ni Vonna aron dili na motaas ang ilang paghisgot sa butang nga alang kaniya walay hinungdan.
Pagkaugma, wala motungha si Michael sa ilang eskuylahan. Nahisagmuyo si Abigail sa pag-absent sa ulitawo. Duna ra ba unta siya’y gustong pakigsultihan niini. Gusto siyang masayod kun nganong wala na gayod mobisita ang ulitawo didto sa gipuy-an niyang boarding house.
Sa tulunghaan sab kaswal kaayo ang ilang pagtinagdanay kun magkaduol sila. Morag dili gusto si Michael nga makigsandurot kaniya. Nakasabot si Abigail nga mora’g gusto si Michael nga modistansiya kaniya.
Pagkasunod adlaw wala gihapon motungha si Michael. Mi-absent gihapon kini sa misunod pang mga adlaw. Dihang natapos ang usa ka semana nga wala gayod magpakita si Michael sa tulonghaan, nagsusi na si Abigail.
Adlaw’ng Sabado. Miadto si Abigail sa gipuy-an ni Michael sa Nadongholan. Nakatultol na siya sa balay nilang Michael kay nahikuyog man siya niadtong paggawas sa ulitawo gikan sa ospital ug mipauli na ngadto sa ilang pinuy-anan. Nahinumdom pa siya sa lokasyon sa balay nila.
Apan wala si Michael sa iyang pag-abot. Ang inahan niini maoy gikasulti ni Abigail. Sayo kunong milakaw si Michael pero wala magsulti kun asa kini mopaingon. Maayo gani kay nahiabot ang manghod ni Michael gikang naglaag. Kini ang mitug-an kang Abigail nga si Michael atua sa Ormoc Lanes Sports Center kay nagdula og bilyar.
Misakay dayon og traysikol si Abigail ug nagpahatod sa Ormoc Lanes Sports Center nga nahimutang sa Lilia Avenue. Tuod man, nagkita gayod sila si Michael. Ingon sa nakugang si Michael pagkakita kaniya. -- Sumpayan pa