Gula 41
Nakalitan si Albert sa kalit nga pagkabukas sa palid sa pultahan sa banyo nga akong giablihan. Midali siya’g talikod. Naligo diay siya. Mao pa tingali iyang pagkahuman og kaligo kay nanarapo man siya sa iyang lawas sa tualya dihang akong nabuksan. Naghubo siya sa tanan!
Naigking ko ug gibatig kaulaw nga naablihan nako si Albert sa sulod sa banyo. Gidali nako sa pagsira’g balik ang pultahan. Milakaw ko palayo sa CR nga daw wala sa kaugalingon. Naulaw ko sa akong gibuhat bisan wala nako makita ang iya ni Albert kay mitalikod man dayon siya pagkaabli sa pultahan ug gitabonan sa tualya ang iyang kaugalingon.
Wala man sab gud ko magdahom nga mosulod si Albert sa CR namong mga babaye kay may CR man sab silang exclusive ra nilang mga lalaking boarders. Maong kompiyansa ra kaayo kong midiretso’g abli sa pultahan sa among CR sa pagtuo nga walay tawo didto sa sulod.
Paggawas ni Albert sa CR, nakita ko niya nga nagbarog duol sa dabahan. Mipahiyom siya.
“Human na ko,” niya pa. “Mogamit ka sa CR?”
“Oo,” mubo kong tubag.
“Sorry, ha. Nalangan ka hinuon. Naguba man gud ang gripo sa among banyo maong nigamit lang una ko sa inyong CR.”
“Okey lang, uy. Ako’y angay mangayog sorry nimo kay naablihan tikaw didto sa sulod. Abi man gud nako’g way tawo sa sulod sa banyo kay wa man ka magpasiga’g suga. Wa sab ko makabati nga nagbusagak ang gripo. Wa pa gyud ka manira sa pultahan.”
“Nalimtan diay nako’g lock ang sira sa pultahan. Wa na lang sab ko magpasiga og suga kay hayag man sa sulod tungod sa ventilation. Para sab maka-save sa kuryente ang tag-iya, ba.”
Misulod na ko sa banyo human sa panagsulti namo ni Albert. Sa akong paggawas sa CR human makatubag sa sugo sa lawas, mipadayugdog na ako paingon sa akong kuwarto. Sa akong pagsulod, gi-lock nako ang pultahan sa lawak ug unya gihagsa ko ang akong kaugalingon sa kama.
Samtang naghigda nga naghayang, gitangtang ko ang akong sapatos. Gitutokan nako ang kisame. Ug sa wala lang damha, mililas sa akong panumdoman ang nahitabo didto sa banyo dili pa lang dugay. Mora’g dunay significant alang nako ang scenario nga naablihan nako si Albert sa sulod sa banyo nga naghubo! -- Sumpayan pa