Gula 43
Gikulbaan si Abigail. Nabalaka siya nga tingalig masuko na sab si Krista kaniya nga nakit-an sila si Harvey niini nga nagsultihanay.
Pero nahuwasan dayon si Abigail sa kabalaka dihang nahiduol na si Krista sa nahimutangan nila ni Harvey. Mapahiyumon kining mitagad kaniya. Mora’g wala na magselos. Mora’g dili na kini insecured.
“Kumosta ka na man, uy,” ni Krista pa ngadto kang Abigail. “Dugay-dugay na man tang wa magka-talk.”
“Okey ra man ko,” kaswal nga tubag ni Abigail.
“I‘ve heard nga mag-on na man kuno mo ni Michael? Usisa ni Krista. “How true?”
“Yes,” ni Abigail pa. “Tinuod ang imong nabalitaan.”
Si Harvey igo lang naminaw sa panagsulti nila ni Abigail ug Krista.
“Good luck sa inyong relasyon,” ni Krista pa. “Ug ingna siya nga get well soon. Gikan namo ni Harvey.”
“Sure,” matud ni Abigail. “Ingnon nako siya.”
Paglabay sa lima ka adlaw nakagawas na si Michael sa tambalanan. Ug pagkasunod semana mibalik na’g tungha ang ulitawo bisan may bandahe pa ang iyang ulo ug bukton. Paspas ang iyang recovery.
Nadakpan na sab ang driver sa sakyanan nga maoy nakadasmag niya ug kini ang mibayad sa tanang balayranan sa pagpatambal ni Michael.
“Unsay plano mo sa driver nga nakabangga nimo?” Sukit ni Abigail usa niana ka higayon nga nagkasulti sila si Michael sulod sa library.
“Di na lang ko mokiha,” ni Michael. “Naluoy sab ko sa maong driver. Akong nasayran nga lisod ang iyang kahimtang. Daghan siya’g mga anak.
Dihang nahingpit na gayod ang kaayohan ni Michael, nagpamisa sila’g pasalamat. Silang duha si Abigail ang nag-una sa mga nanambong sa maong misa pasalamat nga naluwas siya sa tinong kamatayon.
“Salamat sa Dios,” ni Abigail pa samtang nangaon sila si Michael sulod sa usa ka desenteng kan-anan sa downtown.
Ingon sa nasurpresa si Michael dihang gihagkan niya ang aping niini. Apan nasabot niyang nalipay si Michael sa iyang gihimo.
“Thanks for everything,” ni Michael pa. “You really light up my life and give me hope.”
Apan alang kang Abigail, ang paghalok niya kang Michael usa lang ka kaswal nga pagtimbaya, dili sa ngalan nga boyfriend niya kini. -- Sumpayan pa