Gula 84
Niana dayong adlawa, gihimo ni Fernan, ang lider sa mga vigilante, ang plano sa paglikidar kang Sheldon. Sa gihapon, mo-back-up nako ang iyang mga sakop nga pangulohan ni Bredhart. Dili ko nila pasagdan nga mag-inusara sa pagpakigkita kang Sheldon.
Gihatagan sab ni Fernan og mahinungdanong papel si Keith sa plano paglikidar kang Sheldon. Gihangop sab ni Keith ang plano ni Fernan. Nasuta nako nga andam gayod si Keith pagtabang nako kutob sa iyang mahimo.
Nianang pagkaugma, wala pay alas dose didto na kami sa sam-ang sa Magtago nga nahimutang sa habagatang bahin sa siyudad sa Obic. Nakapahimutang na sa pagtago ang mga vigilante nga sakop ni Fernan sa lainlaing bahin sa palibot sa sementeryo. Andam na sila sa bisan unsang mahitabo.
Nangandam na sab ko. Maayo na nakong pagkatago sa luyo sa usa ka panteyon. Gikan sa akong nahimutangan malantaw nako si Keith nga naglingkod dili layo sa dakong krus. Kabahin kini sa plano ni Fernan nga inigsulod ni Sheldon sa sementeryo si Keith dayon ang una niyang makita.
Naghinamhinam kong nagpaabot sa panag-atubang unya namo ni Sheldon. Gusto ko nang ipahamtang kaniya ang kamatayon bugti sa iyang pag-among-among sa akong pagka babaye ug sa iyang pagpatay sa akong boyfriend nga si Orville didto sa Kilometro 35.
Untop gayod alas dose sa udto nakita ko si Sheldon nga misulod sa sementeryo. Kalit lang kong gikulbaan sa tumang kahinam pagkakita kaniya. Mipasalipod ko’g maayo sa luyo sa panteyon samtang gipanid-an ko siya nga naglakaw. Naglingi-lingi siya, kaha nangita kanako.
Unya, napahunong siya paglakaw dihang iyang nakita si Keith nga naglingkod sa ibabaw sa usa ka nitso luyo sa dakong krus.
“Hudas ka, Keith,” masuk-anon nga namulong si Sheldon. “Maayo pag gipatay ka na lang namo ni Karl!”
Unya milanit si Sheldon sa iyang armas! -- Sumpayan pa