Si Iyo Entoy ang nailang tambalan sa among barangay sa Pulangbato. Kun adunay masakit ug dugay nga maayo sa ilang balatian, magduda dayon sila nga gibarang ang masakiton. Dad-on dayon ngadto kang Iyo Entoy ug patambalan.
Adunay mga naayo sa ilang sakit apan daghan usab kanila ang wala baliki sa maayong panglawas ug namatay sa balatiang giantos.
May paryente akong nag-antos sa sakit sa atay nga wa niya hibaw-i gumikan kay mahadlok magpahiling sa doktor, si Manang Estreng. Di siya gustong moduol og doktor ug magpatambal kang Iyo Entoy bisan pa man sa mga paghangyo sa iyang duha ka anak.
Sa dihang di na niya maagwanta ang kasakit nga gibati, napugos siya sa pag-oyon nga dad-on sa ospital ug didto nahibaw-an nga adunay siya’y kanser sa atay ug stage 3 na kini. Wa siya pahibaw-a sa iyang mga anak ug kay way igong magasto alang sa gikinahanglang tambal ug kemo nakahukom ang mga anak sa pagsulay kang Iyo Entoy.
Duol ra ang among balay sa ilang Manang Estreng ug sa dihang nahibaw-an nakong magpatambal sila kang Iyo Entoy mikuyog ko nila kay nakuryoso sab kong makita unsay buhaton sa tambalan.
Sulod sa usa ka lawak diin adto tambali ang masakiton, gipalingkod si Manang Estreng sa usa ka silya nga may sandiganan samtang nagtuyok-tuyok kaniya ang tambalan da ang usa ka lusa nga nag-aso.
Nagpalayo lang ang duha ka anak sa masakiton samtang sa akong kakuryoso (nagpanuigon pa ako niadto og 10 anyos) didto ako duol sa kilid sa masakiton. Gitutokan ko’g maayo ang duha ka kamot sa tambalan. Ang wang kamot naggunit sa nag-asong lusa samtang ang tuo may gikomkom siya.
Samtang nagtuyok-tuyok siya sa masakiton, nakita kong kalit gibukhad niya’g gamay ang tuong pad ug nahug ang gagmay'ng kinhason paingon sa lusa sa pikas niyang kamot.
Mipaingon dayon siya sa duha ka anak sa masakiton nga naglingkod sa bangko sikit sa bongbong.
"Mao kini ang migawas sa lawas sa inyong inahan. Gipadautan siya hinungdan sa sakit niyang gibati." Matud sa tambalan nga mipakita sa mga kinhason.
Nakita kong nakurat ang mga anak kaha kay nasayud silang kanser ang sakit sa ilang inahan. Nakapanlingo-lingo na lamang sila.
"Unya, unsa may tambal imong idapat nako, Iyo?" sukot sa inosenteng masakiton.
"Kining lana sud sa garapa. Tumaron nimo usa ka kutsara matag adlaw," tubag sa tambalan.
Human hatagig bayad ang tambalan, namauli kami ug sa unahan nakita kong gilabay sa anak ni Manang Estreng ang garapa. Sa akong sabut wa siya mosalig sa maong tambal ug seguro kong mosamot ang pagkawa sa iyang pagsalig sa tambalan kun sultihan ko siya sa akong nakita samtang gipaasohan ang masakiton. Nawa usab ang akong pagtuong maayong tambalan si Iyo Entoy kay mini diay siyang mananambal. Wa magdugay ug namatay si Manang Estreng. (Kataposan)