Gula 62
Naigo gyud si Lyle sa akong pagpusil. Natusak ang iyang lawas sa mga bala sa akong armas nga may silencer. Napukan siya ug mihagsa ang nagkadugo niyang lawas sa ibabaw sa pinong bunbon.
Midali dayon ko’g biya sa dapit samtang wala pay laing tawo nga nakakita kanako. Wala na maglihok si Lyle sa akong pagbiya. Misugwak na ang dugo sa iyang ilong ug baba.
Abtik kaayo si Bredhart ug mga kauban nga misugat nako ug maoy migiya kanako sa akong pagsibat!
Pagkagabii, gisaulog namo ni Fernan ang kalamposan sa gihimo namong operation batok kang Lyle Cubillo. Gipahigayon namo ang selebrasyon pinaagi sa mainiton namong pagpinarayganay sulod sa iyang lawak. Nalipay ko sa lain na sab nga kalamposan nga akong naangkon sa nagpadayon nakong pagpanimalos sa mga tawo nga nakasala kanako.
Tugob sa kahinam ug kalalim ang panagsawo namo ni Fernan sa matam-is nga dugos sa lawasnong kalipay. Daw sa mosilaob ang among kalawasan gumikan sa kainit sa among panaghilawas.
“Kinsay sunod nimong tumbahon?” Gipangutana ko ni Fernan dihang nahuman na ang unang hugna sa among panaghilawas.
“Si Keith Agcaoili nay sunod,” maoy akong tubag.
“Ikaw ang mag-igo. Mag-agad lang mi nimo. Pero duna lang ko’y namatikdan nga nakahatag nako’g interes.”
“Unsa kana?”
“Ngano kahang wa man mahikuyog si Keith Agcaoili sa grupo ni Sheldon kaganina didto sa beach resort?”
“Basin og may lain siyang giatiman nga importante.”
Paglabay sa pipila ka gutlo, mirebansin mi. Gisubli namo ni Fernan ang pagkatkat sa kinatumyan sa ikapitong langit. -- Sumpayan pa