Sukad lang naugdaw ang panimalay ni anhing Nyora Lisaperyang, nga taudtaod nang nabiyuda kang anhing Nyor Bertolito, nga nagbuntaog sa may bungtod sa balangay sa Magsiko, nahimo na kining hilan nga agianan, ilabi na kun moabot ang buwan nga maghimatayon, dili gayod saypon nga adunay usa ka "White Lady" nga Negra nga magpakita nga way sanina.
"Mas maayo pa tingali Masyong, nga puslan man nga kanunay na lang makabuhi ang atong kabaw, gumikan sa imong bisyo sa pagkapalahubog ... ato na lang ibaligya!"gidaygan ni Noring ang iyang bana nga wa nay pagkabana sa ilang hayop.
"Magkalisod kita na hinuon ang makabayad kun simbako makasibsib og tanom sa atong mga silingan!"
Dili ikalimod nga gumikan sa pagkapalainom og bahalina ni Masyong sa tindahan ni Uray Porlang, milagro na kaayo ang adlaw nga dili siya mahubog? Mao na lamang ang nabalitan ni Masyong nga maabot ang iyang kabaw sa may kinapusoran sa may bukid sa Magsiko.
"Ayaw ako og ingna Noring, nga sa kahalawom na karon sa kagabhion, ilabi na karon nga naghimatayon ang buwan, mahadlok ako nga maglakaw nga mao rang usa aron mangita sa atong kabaw nga nakabuhi," nangandak si Masyong ngadto sa iyang asawa.
"Basin baya Masyong, kun bugnoon ka sa White Lady nga Negra? Ngitngit ra ba ang dalan nga imong pagalaktan," dihay tambag sa asawa ngadto sa iyang bana.
"Angay ka masayod Noring, nga wa pa matawo dinhi sa kalibotan ang akong gikalisangan. Wa pa!" nagpaminti si Masyong nga mipadayugdog og lakaw nga mao rang usa.
Takulahaw mibundak ang makusog nga ulan. Way kapasilongan si Masyong, gawas niadtong usa ka punoan sa kahoy nga kamansilis nga dili halayo sa naugdaw nga panimalay ni anhing Nyora Lisaperyang.
Ambot unsang hitaboa ... nga mikalit man pag-uwang ang mga iro. Namugnaw na hinuon ang tingkoy ni Masyong nga nagpaminaw.
Unya taliwala sa ataon nga kangitngit ... may nasigpatan si Masyong nga dihay nagdagtom nga mihana niya sa pagduol.
Nakapanguros og ahat si Masyong sa kakulba, kay diha sa iyang pagtuo nga basin mao na kadto ang "White Lady" nga negra nga miduol kaniya. Wa sia mag-usik og laing higayon, gidakdakan niya og bato ang tangkugo sa maong "White Lady" nga Negra diin mao na lamang iyang nabatian nga may daghong kini nga tingog nga nagkanayon:
"Maaaaa .... maaaaaaa!" (Kataposan)