Gula 30
Nakugang pag-ayo si Ervin dihang gitionan ko na siya sa armas nga may silencer nga akong gigunitan. Nakalitan siya ug wala makalihok. Daw natingala siya ug nangluspad nga miatubang nako.
“A-ayaw, Miss,” ni Ervin pa. “W-wa ko’y atraso nimo.”
“Dako ka’g utang nako, Ervin Padios,” giingnan ko siya. “Ug oras na sa pagpaningil sa imong mga sala.”
“Wa ko masayod nianang imong gipanulti. Wa ko makaila nimo!”
“Nahinumdom ka sa krimen nga inyong gibuhat didto sa Kilometro 35?”
“H-ha?”
Dihadiha gilangkat ko ang wig nga akong gisul-ob.
“S-Sandra!” Misamot ang kahikugang ni Ervin dihang nakaila na siya nako. “I-ikaw! Bu-buhi ka diay?”
“Oo. Dakong buhi ug mibalik aron panimaslan kamong tanan.”
“Ug...Tsug! Tsug! Tsug! Tsug! Tsug!
Naigo si Ervin sa lainlaing parte sa iyang lawas sa akong pagpusil kaniya gamit ang armas nga may silencer. Giseguro ko nga sa patyanan gayod siya maigo. Dihang mihagba na siya sa salog sa CR, midali ko pagbiya sa maong dapit samtang wala pay laing tawo nga misulod sa CR.
Gisenyasan dayon ko ni Fernan nga modiretso sa nahimutangan sa get-away vehicle nga maoy akong sakyan sa akong pagsibat. Laing sakop ni Fernan ang nagmaneho sa maong sakyanan.
Igo lang kong nakapahimutang sulod sa get-away vehicle, namatikdan kong nagkagubot na didto sa mall. Nadiskobrehan na tingali ang patay’ng lawas ni Ervin didto sa CR. Gipadagan dayon sa vigilante nga sakop ni Fernan ang awto nga iyang gimaneho. Kadali ra ming nakapalayo sa mall.
Pag-abot namo sa balay ni Fernan nga nahimutang sa bukirang bahin a siyudad sa Obic, midiretso ko sa akong lawak. Nagsuka ko! -- Sumpayan pa