Kilometro 35

Gula 18

Dihang nahuman na ko’g kaon, migawas dayon ang lalaki sa lawak nga akong nahimutangan. Mao pay akong pagkahinumdom nga nalimot diay ko’g pangutana mahitungod sa iyang ngalan.

Nakahatag og interes nako ang iyang gisulti nga duna silay pundok. Dili man sab tingali sila mga tulisan kun tinuod ang gisulti sa lalaki nga dili sila daotang tawo. Dili sab tingali sila mga rebelde kay sa akong nasayran, dili man “boss” ang tawag sa lider sa mga rebelde kun dili “kumander” man. Ug kadtong lalaki nga nakigsulti ug mipakaon nako mitawag man og “boss” sa giila niyang lider sa ilang pundok.

Samtang naghunahuna niini, misakit ang akong ulo. Gipiyong ko ang akong mga mata aron makatulog. Gusto kong madali ang pagbalik sa kalagsik sa akong lawas human ko ma-gang rape ni Sheldon ug sa iyang mga barkada. Daghan ko’g angay buhaton kun mabaskog na ko.

Apan unya, kalit lang nabuka ang akong mga mata dihang may lain kong nahinumdoman. Si Orville! Ang akong boyfriend nga si Orville! Labing seguro, patay na gyud siya! Patay na ang akong hinigugma!

Wala ko kapugngi ang pag-agas sa akong mga luha. Naguol ko sa gidangatan ni Orville. Naluoy ko sa naangkon niyang kaalaotan. Ingon sa bangis ra kaayo ang kahigayonan. Paspas ra kaayo ang mga panghitabo nga miguba sa among kinabuhi ug kaugmaon, butang nga lisod kaayong dawaton sa akong kasingkasing ug kabubut-on.

Gipahiran ko ang akong mga luha. Nagpaminti ang akong mga ngipon dihang nahinumdoman nako si Sheldon ug ang iyang mga barkada. Dako kaayo sila’g nahimong kasal-anan ngari kanako ug kang Orville. Kinahanglang magbayad sila’g mahal sa ilang pagpatay kang Orville ug sa ilang pag-among-among sa akong pagka-babaye. Kinahanglang masilotan sila!

Kinahanglan gyud! -- Sumpayan pa

Show comments