Gula 51
(Kining maong nobela gibase sa matuod nga kaagi ni Dinah)
Usa ka adlaw niana, nakahinumdom si Dinah nga duha ka bulan nang wala siya tunghaa sa iyang binulan nga bisita. Niini, mibati siya’g kabalaka. Miadto siya sa siyudad ug hilom nga nagpahiling sa doktor.
Tuod man, natinuod ang iyang gikabalak-an. Nagsabak siya. Migamit man unta siya’g contraceptives apan misipyat gyud. Hinuon, dihay higayon nga nakig-sex siya nga nakalimot siya’g butang og “protection” sa kaugalingon aron dili siya momabdos.
Si Padre Gio maoy gitumbok ni Dinah nga amahan sa iyang gisabak. Gipakigsultihan dayon niya ang pari mahitungod sa iyang kahimtang.
“Kinahanglang bangonon nimo ang akong dungog,” ni Dinah pa. “Kinahanglang imo kong pakaslan.”
“Di ko makahimo pagpakasal nimo,” balibad ni Padre Gio. “Di ko makabiya sa akong bokasyon.”
“Unya, mag-unsa na man lang ko? Ang atong umaabot nga anak?”
“Problema na kana nimo. Imo man bitaw ning gituyoan. Di man ni akong sala, ba. Ikaw ang nanghagad sa imong kaugalingon nako.”
“Kun di ka magpakasal nako, ibulgar nako sa katawhan ang atong relasyon puslan man.”
“Sige, buhata na. Pero kun buhaton mo gyud kana, matapos sab ang imong career isip usa ka magtutudlo.”
Nasuta ni Dinah nga kalit lang nabalit-ad ang dagan sa panahon. Siya na usab ang naapiki. Ug si Padre Gio makapanghunaw gyud sa kaakohan niini kaniya. Nakaamgo si Dinah nga sa sugal sa kinabuhi, siya na usab ang naapiki ug naalkanse.
Wala masayod si Dinah kun unsay sunod niyang angay buhaton. -- Sumpayan pa