Gula 111
Ang gibuhat namo ni Alva nasubli sa makadaghan. Hapit kada palis siyang modalikyat sa gipuy-an nako nga balay taliwala sa ka-busy niya sa trabaho isip collector sa canton factory nga iyang gitrabahoan. Gahinan gyud niya’g panahon ang pagpakigkita nako. Hinuon, dili man sab siya alkanse kun makigkita siya nako kay segurado man nga maka-score gyud siya.
Ako sab ingon sa nalimot na lang sa pagpangaplay og trabaho. Matag palis magpaabot ko kang Alva. Mora bag sama siya sa usa ka mensahero nga moabot sa akong kinabuhi matag palis aron paghatod og maayong balita. Sa higayon nga mahiabot na siya sa balay, magpahimulos gyud dayon mi pagtagay sa lawasnong kalipay sa walay paglangaylangay. Bulawanon alang sa kinawatkawat namong panagtagbo ang matag takna.
Hangtod nga sa kadugayan, nagkasabot mi si Alva nga dili na magkita sa balay. Nakamatikod man god ko nga ingon sa inanay nang nakatimaho ang tag-iya sa balay sa lahi namong mga lihok. Mao nga nagsabot na lang mi si Alva kun asa ug kanus-a kami magkita.
Nagkasabot mi nga matag Sabado ug Domingo kaming mag-abot sa Aroma Lodge nga nahimutang dili layo sa mga eskina sa mga dalan nga Rizal Avenue ug Recto, atbang gayod sa terminal sa Philippine Rabbit Bus nga nahimutang sab tupad sa Odeon Theater. Sa matag higayon nga magtagbo mi sa Aroma Lodge, magtagbaw gyud mi sa among kaugalingon pagtagay sa dugos sa kinawatkawat nga kalipay.
Hangtod nga usa ka adlaw niana, nasayran na gayod ni Josie ang padayon nga panagkita namo ni Alva. Hilom diay nga gipasundan sa akong ig-agaw ang iyang bana sa mga lakaw niini. Nasakpan mi sa maong detective nga misulod sa Aroma Lodge. Dili mi makabalibad kay may mga hulagway nga nakuha ang detective nga momatuod nga padayon ming naghimo og kinawatkawat nga panagtagbo sulod sa usa ka mabugnaw’ng lawak.
“Kun dili kuno ta mopatuo,” ni Alva pa nga mitaho kanako mahitungod sa gipahimo ni Josie sa detektib. “Mapugos kuno si Josie sa pagpasaka og kasong adulteryo batok natong duha.”
“Nan,” nako pa. “Unsay plano mo karon?”
Naglisod paghukom si Alva. Nasayod kong nahinugon siya sa among relasyon. Nasayod kong nawili siya nako maong naglisod siya pagpakanaog sa iyang desisyon. -- Sumpayan pa